Помощь  -  Правила  -  Контакты

Поиск:
Расширенный поиск
 

Размещено 21:42 1/09/2015




Акафист иконе Божией Матери Донская, в исполнении Хора Братии Свято-Донского мужского монастыря ст.Старочеркасской.

Акафист

Кондак 1    
Взбранной Воеводе победительная, яко избавльшеся от злых, благодарственная восписуем Ти раби Твои, Богородице, но, яко имущая державу непобедимую, от всяких нас бед свободи, да зовем Ти:
     Радуйся, Владычице, иконою Твоею Донскою в напастех нам помогающая.
 
Икос 1
      Архангела благовестие слышавши, Пречистая, соизволи воле Господа Своего и со смирением сердца отвеща: «Се, Раба Господня, буди Мне по глаголу твоему». Мы же, дивящеся, како Сын Божий Сын Девы бывает, со Гавриилом Благодатную песньми почтим:
     Радуйся, Отроковице, от всех родов Богоизбранная;
     Pадуйся, скиние, Духом Святым осененная.
     Радуйся, Живоносная обитель Света Божественнаго;
     Pадуйся, Мати Божия, Спаса миру рождшая.
     Радуйся, яко Тобою, Благодатная, Невидимый нам видим бысть;
     Pадуйся, Всепетая, яко сотвори Ти величие Сильный.
     Радуйся, яко прославлением икон Твоих величие сие возвещается;
     Pадуйся, благодать и милость чудотворными иконами Твоими нам являющая.
     Радуйся, Владычице, иконою Твоею Донскою в напастех нам помогающая.
 
Кондак 2
      Видяще Тя, Богородице, во объятиях Младенца Христа держащую и главою к пречистому Лику Его кротце приникшую, разумеваем Божественную любовь Твою и непрестанное о мире ходатайство. В шуйце же держиши плат чистый, еже слезы плачущих скоро осушати, да никтоже от Тебе неутешен изыдет. Веруем, яко имаши велие дерзновение ко благосердию Владыки, и Богу, давшему нам Тебе, Благую Заступницу, благодарственно поем: Аллилуиа.
 
Икос 2
      Разум немощный не может постигнути глубину смиреннаго служения Твоего, Госпоже, на земли Искупителю нашему, не имевшему, где главу подклонити. Во дни уничижения и страдания Сына Твоего, Богомати, оружие смертное прехождаше сердце Твое. Сего ради сердцем соболезнующе, глаголем Ти таковая:
     Радуйся, незлобивая Агнице, вертеп и ясли смиренно приявшая;
     Pадуйся, Богоприимца Симеона скорбное проречение в сердце начертавшая.
     Радуйся, поношению Сына Божия сострадавшая;
     Pадуйся, крестный путь Его слезами оросившая.
     Радуйся, муки Его крестныя сердцем разделившая;
     Pадуйся, Кресту предстоянием послушание воле Отца явившая.
     Радуйся, гробу Сына Твоего благосердый плач принесшая;
     Pадуйся, Воскресением Его обрадованная.
     Радуйся, Владычице, иконою Твоею Донскою в напастех нам помогающая.
 
Кондак 3
      Cила Вышняго содела Тя, Благодатная, источник неоскудевающ утешения бедствующим. Многи бо скорби претерпевши, можеши и искушаемым помощи. Людем российским, люте страждущим от нашествия агарян, благоволила еси явити образ Твой в струях реки Дона в знамение милости Твоея ко Отечеству нашему, в защиту от враг видимых и невидимых, техже помощию Божиею побеждающе, Спасителю Богу поем: Аллилуиа.
 
Икос 3
      Имуще Тя первую Подвигоположницу, шествующую по стопам Владыки Христа, мужества исполняхуся первосвятителие Московстии и подвижницы благочестия Российстии, беды и напасти претерпевающе, учаще люди духом Господеви работати, ибо сила Божия в немощи совершается. Мы же, видяще веру отец наших и явление благодати, нравы злыя в добрыя претворившия, достойно Тя, Наставницу верных, ублажаем:
     Радуйся, насаждение веры и благочестия;
     Pадуйся, образе несокрушимаго скорбей терпения.
     Радуйся, доблести и веры богатство неистощимое;
     Pадуйся, духа уныния и боязни отгнание. Радуйся, духа разума и крепости стяжание;
     Pадуйся, святых печальников земли Российстей возрастившая.
     Радуйся, в струях Донских чудно икону Твою явившая;
     Pадуйся, реки слез народных ею изсушившая.
     Радуйся, Владычице, иконою Твоею Донскою в напастех нам помогающая.
 
Кондак 4
      Буря превеликаго нашествия агарянскаго потрясе землю Русскую, но не возможе угасити пламень веры в покров Твой, Богомати Пречистая. Великий печальник наш Преподобный Сергий, призвав на помощь Святую Троицу и Тя, Владычице, со упованием благослови великаго князя Димитрия с дружиною поход противу агарян и прорече ему: «победиши враги твоя», темже научи всех пети Всесильному Богу, в Троице славимому: Аллилуиа.
 
Икос 4
      Видя икону Богоматере, на поле брани от Донских предел пришедшую, и, прияв от рук иноков послание Сергия Преподобнаго с напутием: «Да поможет ти Бог и Святая Богородица», возрадовася князь Димитрий, яко Сама Владычица грядет на супостаты, и, воспрянув духом, с надеждею поведе воины своя на тьмочисленныя полчища и победу одержа. Икона же Твоя, Владычице, молниеносным блистанием зрака Твоего враги устрашающи, залог победы являше. Сего ради благодарственно и радостно поем Ти похвальныя сия:
     Радуйся, в явлении иконы Твоея лучами Солнца Правды верных осиявшая;
     Pадуйся, Небесная Воеводо, Мати Господа Сил.
     Радуйся, воинов-иноков на подвиг ратный избравшая и укрепившая;
     Pадуйся, Отечество наше от ига агарянскаго свободившая.
     Радуйся, воином мужества неодолимаго дарование;
     Pадуйся, врага исконнаго грозное низвержение.
     Радуйся, преславную победу православно Тя чтущим даровавшая;
     Pадуйся, земли Русския от века Покров и Помощнице.
     Радуйся, Владычице, иконою Твоею Донскою в напастех нам помогающая.
 
Кондак 5
      Богоявленною звездою возсия икона Твоя Пресветлая, озаряющи утро брани и возвещающи благословение Божие ратоборцем, на брань жестокую с агаряны подвигшимся. Весь день той предстояще Сергий Преподобный с братиею неотступно Престолу Святыя Троицы. Вечеру уже бывшу, победу старец духом познав, о сем радостно провозгласи и благодарственное пение соверши Всещедрому Богу, призывая и нас велегласно воспети Ему: Аллилуиа.
 
Икос 5
      Видя очами веры течение битвы и молитвою ратоборцы укрепляя, поименно поминише Преподобный Сергий вожди и воины убиенныя. Мы же, имуще завет его память о таковех особо творити и Видяще силу молитвы, победу оружию приносящия, из глубины сердца воззовем Божией Матери, Всемощней Покровительнице душу свою полагающих за други своя:
     Радуйся, воинов непреоборимая Споборнице;
     Pадуйся, меч гнева Божия смелым вручающая.
     Радуйся, из терния злостраданий венец победы соплетающая;
     Pадуйся, во бранех силу духа даже до подвига возвышающая.
     Радуйся, болящих и ранами уязвленных не оставляющая;
     Pадуйся, убиенных на поле брани к вечному покою управляющая.
     Радуйся, родителей и вдовиц скорбящих благодатное утешение;
     Pадуйся, Воеводо изрядная, имущая державу непобедимую.
     Радуйся, Владычице, иконою Твоею Донскою в напастех нам помогающая.
 
Кондак 6
      Провозвестник спасения Москвы от внезапного нашествия агарянскаго явися образ Твой, Заступнице скорая. Неприятелем во град внити уже готовым, с верою и слезным молением обнесоша его людие по стенам и стогнам града и поставиша посреде воев в походной церковице Сергия Преподобнаго, и, в молитве прилежаще, усердно взываху Всемилостивому Спасу: Аллилуиа.
 
Икос 6
      Возсиявшу солнцу, узреша стрегущии воини, яко опусте стан агарян; нощию страх внезапу нападе на ня от некия велия силы и, смутившеся, бежаша неудержимо даже за пределы Российския и все изгибоша. О, предивная Заступнице наша! Твоими молитвами скорое избавление сие бысть. Да исполнится же древний храм сей, возвысившийся на месте, идеже стояше чудотворный образ Донский, гласа хвалы сея:
     Радуйся, града Москвы страже неусыпающий;
     Pадуйся, миротворца князя Даниила начало величию Москвы положити сподобившая.
     Радуйся, молитвами святителей и Сергия Преподобнаго град наш ограждающая;
     Pадуйся, в день скорби плач верных в радость претворяющая.
     Радуйся, коварнаго врага внезапным бегством истребившая;
     Pадуйся, упование на помощь Твою не посрамившая.
     Радуйся, свеще неугасимая, веры огнь воспламеняющая;
     Pадуйся, Благодатная, яко Тобою с нами Бог.
     Радуйся, Владычице, иконою Твоею Донскою в напастех нам помогающая.
 
Кондак 7
      Восхотевши оградити Русь Православную, Державная Покровительнице наша, многажды козни агарян и прочих иноплеменник разоряше, пределы страны нашея хранящи, и победы обильныя даже без крове подаваше. Егда же Великую и Малую Россию возсоединитися благословила еси, тем силу Отечества в единении народа нашего, в союзе любве утвердила еси. Благоволи, о Мати Божия, в мире глубоце вселенную сохранити, Тебе бо дадеся благодать всемирнаго заступления пред Владыкою всех, Егоже воинства Небесная славят, поюще Ему: Аллилуиа.
 
Икос 7
      Новаго Стража Неусыпнаго града Москвы достойно почтити хотяще, соборный храм людие благочестивии в Донстей обители соорудиша и на стенах храма воздвигоша изображение иконы Твоея, Богомати, в Божественное ограждение страны нашея, яко да отьинуде находящий врази отражени будут неотступными молитвами Твоими. Тебе же, яко сущей с нами, со упованием глаголем:
     Радуйся, Бога Живаго Храме одушевленный;
     Pадуйся, Боголюбивая, страну Российскую достоянием Своим избравшая.
     Радуйся, нощных бдений и пений молебных скорое слышание;
     Pадуйся, икону Твою, яко знамя побед неотъемлемое, даровавшая.
     Радуйся, прекращением браней мир и радость приносящая;
     Pадуйся, доброе пристанище душам, ищущим спасения.
     Радуйся, Мати мира, смятений волны укрощающая;
     Pадуйся, града Москвы и страны нашея Всемощная Предстательнице.
     Радуйся, Владычице, иконою Твоею Донскою в напастех нам помогающая
 
Кондак 8
      Разсеяшася тучи напастей молитвами Твоими, Заступнице всеблагая, теплая заря покаяния, восходящи, предваряет токи благодати, призывающи к подвигу: веровати право и жити свято. Простри же покров Твой, о Благодатная Мати, на всех грядущих тернистым, но вожделенным путем Христовых заповедей, да вси познают, яко с нами Бог, Ему же поем: Аллилуиа.
 
Икос 8
      Весь мир зле страждет грех ради человеческих, во зло его повергающих. В Тебе, Мати рода христианскаго, начало общаго избавления, исполнение всякия добродетели. Яви же нам, Богомудрая Дево, в Евангелии Сына Твоего Свет Божественный, да, отвергше горечь греха, сладость благочестия обрящем, взывающе Ти сицевая:
     Радуйся, благодати Живоносный Источниче;
     Pадуйся, тоюже мира всего дивное преображение.
     Радуйся, Всеблаженная, ходящая в законе Господни непорочно;
     Pадуйся, слезами покаяния орошающая нас благодатно.
     Радуйся, молитве сердечней научающая;
     Pадуйся, подвигу поста всепомоществующая.
     Радуйся, греховныя помыслы властно отгоняющая;
     Pадуйся, братолюбием темную злобу побеждати повелевающая.
     Радуйся, Владычице, иконою Твоею Донскою в напастех нам помогающая.
 
Кондак 9
      Всех немощных крепосте, печальных утешение, страждущих посещение, верных дерзновение Ты еси, Пречистая Владычице Богородице: всех притекающих под сень Креста Господня ко спасению приводиши, да последуют Искупителю Богу, поюще песнь: Аллилуиа.
 
Икос 9
      Ветии многовещаннии не могут исчести, Человеколюбивая Мати, бездну щедрот Твоих, на злостраждущия и безпомощныя изливаемых. И мы, сладость утешения в нуждах познавше, благословляем Тя с верою и чествуем с любовию, моления возносяще пред образом Твоим сицевая:
     Радуйся, безмолвие дивное в скорбех земных показавшая;
     Pадуйся, скорбящих и плачущих отрадо и утешение.
     Радуйся, болящих Милосердая Целительнице;
     Pадуйся, долгонедужных сладости райския тайное приобщение.
     Радуйся, страждущих любовию ближних окружающая;
     Pадуйся, вдов и сирот незримая Питательнице.
     Радуйся, яко паче жемчуга слезами радости икона Твоя украшается;
     Pадуйся, Отечеству нашему победы обильныя дарующая.
     Радуйся, Владычице, иконою Твоею Донскою в напастех нам помогающая.
 
Кондак 10
      Спасти хотя мир, Сын Божий из Тебе, Дево, плотию облечеся, и благодатию Его падшее естество человеческое, грехом оскверненное, очищение и спасение приемлет. Дивное Божие смотрение о нас Тобою, Дево, содействием Святаго Духа исполняется. Яко Ты еси воистину погибших Взыскание и нераскаянных грешников к покаянию теплому увещание, и Тобою от отчаяния греховнаго избавляеми, дерзаем с веселием пети Искупителю Богу: Аллилуиа.
 
Икос 10
      Стена еси несокрушимая Церкве Христовы, Всенепорочная Дево, верныя бо во искушениих укрепляеши и миром и любовию ограждаеши. Сего ради и воздыхания молитвенная не умолкают зовущих Ти:
     Радуйся, от купели Крещения Благая Восприемнице;
     Pадуйся, супругов благословенною любовию венчание.
     Радуйся, матерем многотрудным изрядная Помощнице;
     Pадуйся, чад непокоривых твердая Наставнице.
     Радуйся, в сиротстве дивное утешение;
     Pадуйся, враждующих нечаемое примирение.
     Радуйся, беззаконнующих светом правды обличающая;
     Pадуйся, грехи наша в мори милосердия растворяющая.
     Радуйся, Владычице, иконою Твоею Донскою в напастех нам помогающая.
 
Кондак 11
      Пение всеумиленное приносим Ти, вместившей Ипостасное Слово Божие. Агнец Божий сый, вземляй грех мира, Той закалается еже датися во вкушение верным. Сподоби же нас, Мати Божия, достойно причащатися Пречистых Тела и Крове Его, да, спасение улучивше, воспоем Жизнодавцу Богу: Аллилуиа.
 
Икос 11
      Дщи Отца Небеснаго, Мати Сына Божия, Невесто Духа Святаго, неисчерпаемое море даров Божественных Ты еси, Всесвятая Дево. Умоли Человеколюбца Господа открыти нам источник всеоживляющия благодати, да очищенным сердцем потщимся возрастити плоды Духа, в радости и веселии зовуще Ти:
     Радуйся, плодов Духа Святаго всецелое стяжание;
     Pадуйся, радостию духовною насыщение пречудное.
     Радуйся, мира непоколебимаго дарование благонадежное;
     Pадуйся, благости любвеобильныя исполнение.
     Радуйся, милосердия о Христе насаждение неувядаемое;
     Pадуйся, веры живыя утверждение несокрушимое.
     Радуйся, кротости незлобивыя Наставнице несравненная;
     Pадуйся, спасения нашего средостение вражды разрушившая.
     Радуйся, Владычице, иконою Твоею Донскою в напастех нам помогающая.
 
Кондак 12
      Благодатную помощь многажды являла еси, Царице Небесная, чрез чудотворный образ Твой Донский, егда смерть вскоре предстояще людем. Сего ради на обратней стране иконы сей древния изображено есть и всечестное Успение Твое, да всяк, подвизающийся во славу Бога и на благо ближняго, не убоится смерти, но, взирая, како Твоя душа приемлется в руце Бога Живаго, с надеждею предает себе в час смертный Судии всех Богу, вопия Ему: Аллилуиа.
 
Икос 12
      Поющие Тя, в молитвах неусыпающую Богородицу, Святей Троице предстоящую, вопием Ти: пробуди нас светом живоноснаго Успения Твоего от смертоноснаго сна нерадения о спасении души и испроси нам с Господом примирения. Егда же приспеет жатва смертная житию нашему, огради нас всесильным предстательством Твоим от духов злобы, да, Тобою водими, достигнем Царствия Небеснаго, идеже незаходимое Солнце Правды невечерний Свет Славы Божественныя изливает. О Всесвятая Дево, от Херувим воспеваемая, приими от нас, недостойных, похвалы сия:
     Радуйся, Обрадованная, во Успении Твоем нас не оставляющая;
     Pадуйся, Мати Всепетая, одесную Бога предстоящая.
     Радуйся, горняго мира боголепная красото;
     Pадуйся, кладезю богомыслия неисчерпаемый.
     Радуйся, любве Божественныя светильниче неугасаемый;
     Pадуйся, греховных уз скорая Решительнице.
     Радуйся, воздушных мытарств прехождение неоскудное;
     Pадуйся, благая Вратарнице, двери райския верным отверзающая.
     Радуйся, Владычице, иконою Твоею Донскою в напастех нам помогающая.
 
Кондак 13
      Всемилостивая Владычице Богородице, Российския страны дивная Заступнице, обидимых прибежище, грешных спасение! Отечество наше от враг защити, вселенную всю миром благослови, веру православную укрепи, скорби и крест со упованием понести помози, в любви и согласии всех нас соблюди и в радость Господа внити сподоби поющих ему: Аллилуиа.

Этот кондак читается трижды, затем 1-й икос «Архангела благовестие...» и 1-й кондак «Взбранной Воеводе...».

МОЛИТВА

      Пресвятая Владычице, Дево Богородице, Заступнице наша благая и скорая! Воспеваем Ти вси благодарственная за чудная дела Твоя. Песнословим от лет древних неотъемлемое заступление Твое граду Москве и стране нашей, чудотворным образом Твоим Донским всегда являемое: в бегство обращаются полки чуждих, грады и веси невредими сохраняются, людие же от лютыя смерти избавляются. Осушаются очи слезящеи, умолкают стенания верных, плач в радость общую претворяется. Буди и нам, Пречистая Богородице, утешение в бедствиих, возрождение надежды, образ мужества, источник милости и в скорбных обстояниих неистощимое терпение нам даруй. Подаждь коемуждо по прошению и нужде его: младенцы воспитай, юныя уцеломудри и страху Божию научи, унывающия ободри и немощную старость поддержи. Посети в болезнех и печалех сущия, злая сердца умягчи, братолюбие укрепи, мира и любве всех нас исполни. Примири, Благосердая Мати, враждующия и оправдай оклеветанныя. Истреби пороки, да не восходят грехи наша пред Судиею всяческих, да не постигнет нас праведный гнев Божий. Твоими молитвами, всемощным Твоим покровом огради нас от нашествий вражиих, от глада, губительства, огня, меча и всякаго иного злострадания. Уповаем молитвами Твоими получити от Всевышняго Бога грехов прощение и изглаждение и с Богом примирение. Умоли стяжати нам Царствие Небесное и по скончании жизни нашея одесную Престола Божия стати, идеже Ты, о Всепетая Дево, Святей Троице в вечней славе предстоиши. Удостой и нас с лики Ангелов и святых тамо восхвалити Пречестное имя Сына Твоего со Безначальным Его Отцем и Всесвятым и Благим и Животворящим Его Духом, во веки веков. Аминь.
 
Требуется материальная помощь
овдовевшей матушке и 6 детям.

 Помощь Свято-Троицкому храму