Канон Святителю Нектарию,
митрополиту Пентапольскому и Эгинскому Чудотворцу

Глас 8

Песнь 1

Ирмос: Колесницегонителя фараоня погрузи чудотворяй иногда Моисейский жезл, крестообразно поразив и разделив море, Израиля же беглеца, пешеходца спасе, песнь Богови воспевающе.

Припев: Святителю Отче Нектарие, моли Бога о нас

Приидите, вернии, песнь духовную возопием, и прославим Христа Бога днесь, иже светло Нектария прославил есть. Богомудраго Святителя, обители Эгинския устроителя и о душах наших непостыдного предстателя.

Троицы служителю истиннейший, Христов друже искреннейший, Богородицы чтителю всеусерднейший, источник Божественныя любве источающий, о нас прилежно молися, Богоблаженне Нектарие, получити нам благая молитвами твоими.

Измлада Христа Бога чисте возлюбив, сын утешения был еси, Боголюбче. Ангельскими нравы и благоговением украшенный, молитве и посту прилежал еси, и тако усердно Господеви поработал еси. Тем убо моли тобою всем сердцем возлюбленнаго Христа Бога нашего спасти и просветити души наша.

Слава: Избран быв из детска служити Христу, душу и тело предал еси Творцу, мир и вся яже в нем оставил еси, монашескими подвиги преукрасился еси. Молитвы теплыя Сладчайшему слезно творя, достигл еси к Небесным чертогам Царя.

И ныне: Марие, Дево Чистая, Пресвятая Богородице. Царице, Мати Дево, Руно, всех покрывающее, Превысшая Небесных Сил, нетварное сияние, Ликов девичьих Радосте и Ангелов Превысшая. Радуйся, Невесто Неневестная!

Песнь 3

Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, Едине Человеколюбче.

Припев: Святителю Отче Нектарие, моли Бога о нас

Духовного ради учения дом свой оставивый и путь свой, молясь, в Константин Град направивый, идеже нищету и глад испытавый, и в скорби своем Христу Богу письмо написавый. Молитва твоя услышана бысть и утешение свыше ти послано бысть.

Егда возгореся сердце твое монашескаго жития вожделением зело, Подвигоположник Христос направил тя еси на остров Хиос, идеже тамо обеты Сердцевидцу принесл еси и житие свое подвигами вельми благоукрасил еси.

Видеша Ангелы ангелоподобное житие твое, и весть о подвизех твоих до небес возлете. Престолу Господню вси предстоя, славяще Христа Царя, возлюбившего тя. К Нему же молитву за нас принеси и сердца наша к Горнему вознеси.

Слава: В мире живый, Небесный Иерусалим возлюбил еси и сердце твое Христу Богу прилепил еси, Богородицу в молитвах призывал еси и Покров Ея честный получил еси. Мы же твоя подвиги хваляще взываем: умоли убо нам Царствие Небесное наследовати и вкупе с тобою Триединого Бога прославити.

И ныне: Марие, Дево Чистая, Пресвятая Богородице. Небес Честная Сило и Свете, паче всех светов, Честнейшая Владычице всех Небесных Воинств, всех Праотцев Надеждо, пророков Исполнение. Радуйся, Невесто Неневестная!

Седален, глас 8

Спастися всем хотя преблагий Господь яви тя, святителю отче Нектарие,/ образ жития чистаго и праведнаго:/ кто бо не умилится, видя твое безмерное ко всем благосердие/ и велия чудеса, исходящия от честных мощей твоих./ Темже и нам, к Тебе притекающим, Небесную Благодать низпосли,/ болезни наша исцели и моли Христа Бога,/ грехов оставление подати,/ чтущим любовию святую память твою.

Слава и ныне: глас и подобен тойже

Ты еси верным похвала, Безневестная Дево,/ Ты заступление и священное прибежище христианом:/ к Сыну бо Своему и Богу мольбы носиши, Всенепорочная,/ и от бед и скорбей присно спасаеши/ верою и любовию /Богородицу Чистую Тя величающих.

Песнь 4

Ирмос: Ты моя крепость, Господи, Ты моя и сила, Ты мой Бог, Ты мое радование, не оставль недра Отча и нашу нищету посетив. Тем с пророком Аввакумом зову Ти: силе Твоей Слава, Человеколюбче.

Припев: Святителю Отче Нектарие, моли Бога о нас

Сосуд избран был еси, досточудне Нектарие, пронести имя Христово пред человеки поставлен был еси, темже архиерейской благодатью благоукрасился еси и Архииереем Небесным во град Каир послан был еси. Моли Христа Бога спастися душам нашим.

Нектар жизни Христос подавающий, оросил еси душу твою росою Благодати Божественнейшей. Христа основание себе положил еси и паству твою в вере утвердил еси. Темже и нас в добродетелях соверши, молим ти ся, Архиерею добрый.

Всенощная совершая, Блаженне, бдения, победил еси демонов полки борения. Мног плач и рыдание проливал еси, и в жертву живу себя Христу Богу принесл еси. Ризы пасомых твоих слезами омыл еси и сердца их к Горнему направил еси. Сего ради молим Тя: молися прилежно во еже спастися нам.

Слава: Яко Муж благой воли, чуждый всякой злобы, безхитростный и смиреннейший, Архиерею Божий. Молитву нашу сию приими и к Престолу Триипостаснаго Божества вознеси, да прегрешений оставление и спасение вечное подаст душам нашим.

И ныне: Марие, Дево Чистая, Пресвятая Богородице. В подвизех Ты помоще, Кивоте Бога Слова, и девам Ликование, и матерем Отрадо, Целомудрия Наставнице, душ наших Очищение. Радуйся, Невесто Неневестная!

Песнь 5

Ирмос: Вскую мя отринул еси от лица Твоего, Свете Незаходимый, и покрыла мя есть чуждая тьма, окаяннаго, но обрати мя и к свету заповедей Твоих пути моя направи, молюся.

Припев: Святителю Отче Нектарие, моли Бога о нас

Храм Николы обновил еси, Нектарие Преславне, и престол его златом преукрасил еси достославне, сего ради Мирликийский Чудотворец явился ти еси, и за любовь твою велию целование духовное дал ти еси. Темже о нас молитву сотвори и благодать нам у Христа Бога испроси, молим ти ся, Отче присноблаженне.

Яко многосветлая звезда был еси пастве твоей, Нектарие, и яко златословесная уста просветил еси всех, Церкве Украшение. Пастырю Божественному последовал еси, клевету и гонение Христа ради, ничтоже вопреки глаголя, приял еси. Сего ради смирению, терпению и кротости нас научи, молим ти ся, Отче преблаженне.

Видя враг рода человеческаго тебе, Святче, на высоту духовную вознесшагося, зело восхоте погубити тя, и, якоже некогда Иосифова братия его продаша, такожде и братия твоя тя предаша и оклеветаша. Но ты, яко архиерей милостивый, простил им еси и житие свое Христу Богу вверил еси, на гонение тя воззвавшаго.

Слава: Егда Престолу Божию предстояще ти и Безкровну Жертву Ему приношаше, Ангелы имел еси ти сослужаще и молитву твою в Небеса возносяще. Такожде и нашу молитву сию приими и в Божественный Чертог вознеси, исцеление душам и телесем нашим испроси, да вкупе с тобою прославим Троицу Единосущную.

И ныне: Марие, Дево Чистая, Пресвятая Богородице. Покрове, ширший облака, и страждущих Пристанище, немощных Покров и Заступнице, Надеждо ненадежных. Радуйся, Невесто Неневестная!

Песнь 6

Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.

Припев: Святителю Отче Нектарие, моли Бога о нас

Скорби и разлучение с паствою Пентапольскою, Отче, восприял еси. Обаче и новей пастве твоей сокровище безценное явился еси. Глаголы мудрыми, постом и молитвою, яко солнце пресветлое, стаду Твоему возсиял еси, и в Любве Христовой утвердил я еси. Сего ради молим тя: воздвигни нас молитвами твоими из глубины греховныя.

Нищету телесную и глад претерпевый, нищия возлюбивый и сия удовливый. Яко Самому Христу всякому человеку послуживый и добродетельми своими Богу угодивый. Тако бо сердце свое, Отче, Богу отдал еси и радость велию людем даровал еси. Буди и нам помощник и заступник в жизни, при смерти и по смерти нашей.

Ведый немощь естества человеческаго, яко отец чадолюбивый, спасительныя руки, Нектарие, нам простри и немощи души нашея исцели. В нуждах наших нас посети, и от клеветы человеческия защити, благодать любящим Тя обильно низпосли, твердую веру в сердцах наших утверди, молимтися, Отче Преблаженне.

Слава: В житии твоем крест тяжкий понесый, и гонения претерпевый, клеветою уязвлен быв, не имел еси где главу поклонити. Страждущим и обидимым ныне предстатель явился еси, больным врача крепка нам Бог даровал Тя еси. Сам бо пострадав, имаши ныне власть и дерзновение молити о нас Троицу Единосущную.

И ныне: Марие, Дево Чистая, Пресвятая Богородице. Ааронов Жезле прозябший, Сосуде тихой радости, всех сирых и вдов Утешение, в бедах и скорбех помоще. Радуйся, Невесто Неневестная!

Кондак, глас 4

Преподобнически пожив, яко мудрый иерарх,/ прославил еси Господа/ добродетельным житием, Нектарие преподобне./ Темже, Утешителя прославлен силою,/ Божественными мощми твоими,/ демоны отгониши и болящия исцеляеши,/ верою приходящия ти.

Песнь 7

Ирмос: Отроцы еврейстии в пещи попраша пламень дерзновенно и на росу огнь преложиша, вопиюще: благословен еси, Господи Боже, во веки.

Припев: Святителю Отче Нектарие, моли Бога о нас

Возвеличи Господь в мире Нектария, благодать подал еси ему всем исцелити недуги велия. От болезней всяческих, помышлений бесовских, скорбей пагубных, злых бед и обстояний нас молитвами твоими, Отче, свободи, и с тобою пети сподоби: благословен еси, Господи Боже, во веки.

Недостойными усты приносимое тебе хваление, приими от нас, Богоблаженне Нектарие. Наследниками вечных благ нас сотвори, любящий свой взор к нам грешным простри. Жизнодавца Христа за нас умоли и радость жизни вечныя нам даровати проси, да поем вси: благо¬словен еси, Господи Боже, во веки.

Христа Господа вседушне возлюбил еси, Ангелов удивление, просветивши стезю жизни твоея светом Богоразумия, Угодниче Христов Нектарие. Ныне бо Небесный Чертог унаследовав, тамо Бога прославляеши и молитвы за ны пред Ним слагаеши. Егоже и нас сподоби, да поем Ему: благословен еси, Господи Боже, во веки.

Слава: Странника и пришельца прият тя Эгина, Боголюбче Нектарие, в нейже теплоту и свет Христов обильно источая, многим путь ко Христу явил еси. Триипостасного Божества обитель устроил еси и в нейже множество инокинь собрал еси. Моли Всесвятую Троицу, молим тя, исцелити телеса и души наша в богосозданную нашу красоту.

И ныне: Марие, Дево Чистая, Пресвятая Богородице. Священная и Непорочная Владычице Всепетая, приклони ко мне милосердие Божественного Сына, Ходатаице спасения, припадая, взываю Ти: Радуйся, Невесто Неневестная.

Песнь 8

Ирмос: На горе святой прославльшася и в купине огнем Приснодевы Моисеови тайну явльшаго, Господа пойте и превозносите во вся веки.

Припев: Святителю Отче Нектарие, моли Бога о нас

Имея крепкую любовь к Пречистей Владычице, притекал еси присно под Покров Ея, Богоизбранниче. Теплыя молитвы к Ней слезно возносивый, пред иконою Ея утешение в скорбех взыскавый. Умоли дати и нам покров Ея и защиту, да сподобимся купно с тобою пети ей: Агни Парфене*, радуйся!

Хотяще вознести достойное благодарение Царице Небесней, слагал еси Ей, Отче, песнопения в душе твоей златозарней. Чуднаго явления Богородицы удостоился еси, Избранником Божия Матере нареклся еси. Мы же, видяще твое неотступное упование на милость Ея, поем купно с тобою: Агни Парфене, радуйся!

Видя Христос Царь и Господь твою премногую добродетель и любовь к Пречистой Матери Своей, возлюби тя зело и щедротами Своими тя осия и на обитель твою благодать свыше излия. Ведомый и укрепляемый Богоматерию, научи и нас, Святый Нектарие, пети песнь Богородице: Агни Парфене, радуйся!

Слава: Во дни земнаго странствия твоего, нищету и скорби, оклеветание и гонение терпя, не имел еси отечества земнаго, ниже покоя, многоскорбный Святителю Христов. Не о славе земной попечение имел еси, но паче о славе небесней. Ныне же светом безначальнаго Сияния Божественныя Троицы наслаждаешися, моли о нас, любяших тя.

И ныне: Марие, Дево Чистая, Пресвятая Богородице. Чертоже Слова священный, цвете нетления. Честнейшая Херувим, препрославленнейшая Бесплотных Серафим, Престолов превышняя. Радуйся, Невесто Неневестная!

Песнь 9

Ирмос: Ужасеся о сем Небо, и земли удивишася концы, яко Бог явися человеком плотски и чрево Твое бысть пространнейшее Небес. Тем Тя, Богородицу, Ангелов и человек чиноначалия величают.

Припев: Святителю Отче Нектарие, моли Бога о нас

Мног плач и рыдание любящим тя отшествием твоим к Богу, отче, сотворися, но Вышний Иерусалим, прием тя в недра своя, возрадовася, идеже живый, не забуди стада твоего и моли за нас, Нектарие, к заступлению твоему прибегающих, испроси нам время на покаяние, освободи от рабства страстей, да причастницы жизни вечныя будем.

Вемы, яко по отшествии твоем телеснем, духом с нами пребываеши, Богом званный Нектарие, и от мощей твоих обильно благодать и цельбу источаеши всем, с верою призывающим имя твое. Темже и нас избави от недугов душевных и телесных, и от всякия скорби и печали, имаши бо дерзновение к Богу непрестанно молитися за вся.

Призванный от Господа в земнем житии ко крестоношению, в небеснем же ко славе вечнующей, молитвою утешение в сердце своем обретый, кротостию уничижение препобедив, и во свете ныне ликуеши, очима своима видящи пребожественную красоту тобою всем сердцем возлюбленнаго Христа Бога нашего, Егоже моли спастися нам.

Слава: Тесноту и скорби понесл еси, клевету человеческую претерпевая, стопы своя направляя по Слову Христову, заповеди Божии верно храня. Ныне зриши селения Святыя Троицы, идеже несть печаль ни воздыхание. И яко восходя тамо душею, нам мощи твоя оставил еси и твердо обещался еси: да всяк, приходящий к заступлению твоему не отыде никогдаже безутешен.

И ныне: Марие, Дево Чистая, Пресвятая Богородице. Подательнице кроткая надежды и покрова. Отроковице тихая, пристань спасения, Госпоже всего мира. Надеждо ненадежных. Радуйся, Невесто Неневестная!

Эксапастиларий

Отдаю тебе пение сие, яко долг некий, обаче ничтоже достойно твоих дарований принесох ти, Архиерею прозорливый. Токмо молю тя, Нектарие, безсмертия вожделеннаго сподоби и мя, последняго от молитвенник твоих.

Тропарь Свт. Нектарию Эгинскому глас 1

Силиврии отрасль и Эгины хранителя, в последняя лета явльшагося, добродетели друга искренняго, Нектария почтим вернии, яко Божественного служителя Христова: точит бо цельбы многоразличныя благочестно вопиющим: слава прославльшему тя Христу, слава давшему ти чудес благодать, слава действующему тобою всем исцеления.

Молитва Свт. Нектарию Эгинскому

О, мироточивая главо, Святителю Нектарие, Архиерею Божий! Во времена великаго отступления, нечестию мир пленившу, благочестием просиял еси и главу прегордаго Денницы, уязвляющаго нас, сокрушил еси. Сего ради дарова ти Христос врачевати язвы неисцельны, за беззакония наша нас поразившия. Веруем: возлюби тя Бог праведнаго, да тебе ради нас, грешных, помилует, от клятвы разрешит, от недуг избавит, и по всей вселенней страшно и славно будет имя Его, Отца и Сына и Святаго Духа, ныне и присно и во веки веков. Аминь.

................

*Агни? Парфе?не (греч. ???? ???????), Чистая Дева — греческий православный гимн Пресвятой Богородице, написанный святителем Нектарием Эгинским, который, во время молитвы услышал слова и мелодию гимна от ангелов.