АКАФИСТ ПРЕСВЯТЕЙ БОГОРОДИЦЕ ВО ОБСТОЯНИИ
Кондак 1

Избранной от всех родов и высшей всякого создания Владычице мира, достойное поклонение принесем в покаянии молящеся и зовуще: Владычице, помози ми.

Икос 1

Ангел и человек превышая, Богородице, не возгнушайся мене недостойнаго. Но яко Благосердая, призри на мя и услыши мя вопиюща Ти:

Владычице, приими молитву мою.

Владычице, даждь ми слезы умиления.

Владычице, даждь ми плач о грехах моих,

Владычице, даждь ми покаяние и сердце сокрушенное. Владычице, помози ми.

Кондак 2

Видевше Тя Апостолы со множеством Ангел во успении явльшуюся им, возопиша: Пресвятая Богородице, спаси нас поющих Сыну Твоему и Богу: Аллилуиа.

Икос 2

Разум недоразумевает, како скверными усты просити Твоея помощи, но Ты, Милосердая, ведая человеческаго существа немощи, Сама просвети мя и научи, молюся.

Владычице, услыши мя недостойнаго.

Владычице, не остави мене погибающего.

Владычице, очисти мя сквернаго.

Владычице, неотрини мене.

Владычице, не забуди мене.

Владычице, заступи и спаси мя. Владычице, помози ми.

Кондак 3

Силою Вышняго осени мя, Пречистая, можеши бо у Сына Твоего испросити вся, елика хощеши, всем притекающим к Тебе и вопиющим Богу: Аллилуиа.

Икос 3

Имея милосердия богатство неоскудное, незабуди мене, Владычице, тепле просяща.

Владычице, помози ми во обстоянии.

Владычице, ризою Твоею защити мя.

Владычице, буди мне грешному ходатаица.

Владычице, не погуби мене по милости Твоей.

Владычице, помилуй мя падшаго.

Владычице, услыши мя во грехах рожденнаго.

Владычице, возвесели отягченное сердце мое.

Владычице, муки всякия избави мя.

Владычице, помози ми.

Кондак 4

Бурею многих зол содержима гонителя Савла соделала еси молитвами Твоими возлюбленна Богу, его же славят небесная воинства песнию: Аллилуиа.

Икос 4

Услыши, Владычице, молитву мою и предстани ми в помощь скоро и якоже онаго омраченнаго Савла, возведи мя от мрака греховнаго, на тя уповаю и Тебе молюся:

Владычице, освети мя темнаго.

Владычице, возведи мя заблудшаго.

Владычице, настави мя на путь спасения.

Владычице, очисти мой ум от помыслов суетных.

Владычице, исполни сердце мое любовию Христу моему.

Владычице, примири мя со Христом.

Владычице, имиже веси судьбами, спаси мя.

Владычице, помози ми.

Кондак 5

Богоизбранная Отроковице, прослави чтущихТя и Сына Твоего Христа Бога нашего в вышних славимаго: Аллилуиа.

Икос 5

Видиши Владычице, скорби моя, зриши печали моя и сих ради зову: помози ми.

Владычице, отыми беззакония моя.

Владычице, отверзи сердце мое окаянное.

Владычице, утверди мя в добродетели.

Владычице, уврачуй греховныя раны моя.

Владычице, взыщи мене:

Владычице, ущедри мя.

Владычице, отверзи ми райския двери.

Владычице, спаси мя.

Владычице, помози ми.



Кондак 6

Проповедник Богословия, сладкопевец Роман, тобою умудрен, нача благохвалити Тя и Богу разумно пети: Аллилуиа.

Икос 6

Возсияла еси, Владычице, яко заря от истиннаго солнца правды, премудростию всех просвещающи, прости, молюся, и мене омраченнаго: Владычице, отверзи умныя очи, да вижду дела Божия. Владычице, прости моя мысли сердечныя. Владычице, отверзи уста моя, да благословлю Господа. Владычице, просвети моя чувства. Владычице, огради сердце мое от похотей лукавых, мыслей, желаний и глагол неподобных. Владычице, дух правый обнови вo утробе моей. Владычице, помози ми.

Кондак 7

Восхоте Господь сотворити Тя людем ходатаицу, да Твоим державным покровом весь мир сохраняем, прославит Его в Троице славимаго песнию: Аллилуиа.

Икос 7

Дивно спасла еси Молитвами твоими Петра из темницы; дивно к Богу дерзновение Твое. Тем же, Владычице, буди ныне и мне Заступница усердная, молюся. Владычице, изыми мя из руки сопротивнаго. Владычице, спаси мя от напрасный смерти. Владычице, избави мя от зависти и всяких наветов и клеветы человеческия. Владычице, покрый мя кровом крилу Твоею. Владычице, избави мя от всякия напасти. Владычице, помози ми.

Кондак 8

Странно Тя от небес пришедшую и во Влахернской церкви со святыми молящуюся, людие же видевше, с веселием вопия ху Богу: Аллилуиа.

Икос 8

Всеми Вышними и нижними властвующая, Богородице, спаси и помилуй мя. На Тя надеюсь и Тебе призываю: Владычице, препитай мя алчущаго. Владычице, напой мя жаждущаго. Владычице, избави мя от смертоносныя язвы и всякия болезни. Владычице, спаси мя от грома и потопления, и огня и всякия беды нечаянныя. Владычице, помози ми.

Кондак 9

Всем сердцем и душею вопию Ти: избави мя, Госпоже, от злых, якоже Твой град, Твои люди бурею и ввержении молнии спасла еси от лютаго Хагана, да в роды родов победительная воспою Тебе и Богу моему: Аллилуиа.



Икос 9

Витийством аще силы Твоя не могут по достоянию воспети уста моя, обаче духи сердце стремятся к тебе молящеся: Владычице, избави мя от всех зол. Владычице, сокруши враги под ноги наша, Владычице, даруй рабом твоим мир и благоденствие. Владычице, укроти сердце мое от гнева, злобы и зависти. Владычице, помози ми.

Кондак 10

Спаси от бед раба Твоего, Богородице, и призри, Всепетая, на мя благосердием молюся Ти и Сыну Твоему, вопиюще: Аллилуиа.

Икос 10

Царице неба и Владычице всех, не забуди мене во вся дни живота моего и во всяком месте и обстоянии буди ми покров и защищение. Се, Госпоже, весь живот мой предаю Ти, яко отроча на матерь свою, уповающе молюся: Владычице, буди ми в печали утешение и в скорби радование. Владычице, огради мя от всех напастей. Владычице, не остави мене до конца: Владычице, вся полезная ми даруй. Владычице, помози ми.

Кондак 11

Пение всеумиленное приношу Ти недостойный и вопию Ти: подаждь исцеление страстьми люте бесящейся плоти моей и яростию палимому духу, да не поработаю сатане, но благоугожду Богу моему, поюще: Аллилуиа.

Икос 11

Света тихаго Мати, осияй мя светом спасения, да вижду стыдныя дела моя и прежде смерти принесу покаяние, зовуще Ти во умилении сердца и духа яко споручнице грешников молюся: Владычице, не предаждь мя злобе сатанинския. Владычице, отжени от мене уныние и мечтание злых духов. Владычице, обрящи душу мою. Владычице, даждь ми память смертную. Владычице, огня неугасимаго и вечных мук свободи мя. Владычице, помози ми.

Кондак 12

Благодать Божественную испроси ми, Владычице, у Сына Твоего и Бога, да не погибну люте, но да улучив век оный, в стране живых присно зову: Аллилуиа.

Икос 12

Воспевающе Твое твердое предстательство, поклоняюся Тебе, Владычице, и со умилением молюся: Владычице, испроси вся благая временная и вечная. Владычице, не погуби Владычице, не презри мене. Владычице, помилуй мя. Владычице, возведи мя от земли к небесным. Владычице, сопутствуй ми по исходе души моея. Владычице, предстани ми во исходе души моея. Владычице, предстани за мя милостивно на страшнем Судище Христове. Владычице, избави мя вечныя муки. Владычице, помози ми.

Кондак 13

О, Всепетая Мати! Усердная Заступнице, нынешнее приемши приношение, от всякия избави напасти всех, и будущия изыми муки, о Тебе вопиющих: Аллилуиа.

Кондак 1

Избранной от всех родов и высшей всякого создания Владычице мира, достойное поклонение принесем в покаянии молящеся и зовуще: Владычице, помози ми.

Икос 1

Ангел и человек превышая, Богородице, не возгнушайся мене недостойнаго. Но яко Благосердая, призри на мя и услыши мя вопиюща Ти:

Владычице, приими молитву мою.

Владычице, даждь ми слезы умиления.

Владычице, даждь ми плач о грехах моих,

Владычице, даждь ми покаяние и сердце сокрушенное. Владычице, помози ми.

Аминь!