FAQ  -  Terms of Service  -  Contact Us

Search:
Advanced Search
 

Posted at 16:25 on 27/04/2011
Канон святой мученице Татиане

Память празднуем 12 (25) января

Тропарь, глас 4
Агница Твоя, Иисусе, Татиана зовет велиим гласом: Тебе, Женише мой, люблю, и Тебе ищущи страдальчествую, и сраспинаюся, и спогребаюся крещению Твоему, и стражду Тебе ради, яко да Царствую в Тебе, и умираю за Тя, да и живу с Тобою. Но яко жертву непорочну приими мя с любовию пожершуюся Тебе. Тоя молитвами, яко милостив, спаси души наша. (Дважды.)
Слава, и ныне, Богородичен: Еже от века утаенное и Ангелом несведомое таинство, Тобою, Богородице, сущим на земли явися Бог, в неслитном соединении воплощаемь, и Крест волею нас ради восприим, имже воскресив первозданнаго, спасе от смерти души наша.

Канон, глас 2

Песнь 1
Ирмос: Грядите, людие, поим песнь Христу Богу, раздельшему море и наставльшему люди, яже изведе из работы египетския, яко прославися.

Припев: Святая мученице Татиано, моли Бога о нас . (Поклон.)

Мученическими озарена светлостьми, чистому предстоиши, мученице, Жениху твоему, душетленных прегрешений просящи избавится хвалящим тя.
Святая мученице Татиано, моли Бога о нас.
Богатство тленное, мученице, совершенно пренебрегла еси, на небесех нетленное и пребывающее ищущи усердно, и радующися прошла еси мученическое страдание.
Слава: К ранам, к болезнем и биением многовидным безбоязненно, мученице, отлучилася еси, споспешествующую бо имела еси благодать Спасову, и укрепляющую тя.
И ныне: Источник безстрастия рождшая, уязвленнаго страстьми, Отроковице, исцели, и огня вечнаго исхити мя, едина Богоблагодатная.

Моли Бога о нас, святая мученице Татиано, яко мы усердно к тебе прибегаем, скорой помощнице и молитвеннице о душах наших. (Поклон.).
Песнь 3
Ирмос: На камени мя веры утвердив, разширил еси уста моя на враги моя, возвесели бо ся дух мой, внегда пети: несть свят, якоже Бог наш, и несть праведен паче Тебе, Господи.
Святая мученице Татиано, моли Бога о нас.
Не поколеба столпа твоего сердца стекшее мук треволнение, утвердися бо на камени любве Христовы, всехвальная, к Немуже взывала еси: яко несть свят, паче Тебе, Господи.
Святая мученице Татиано, моли Бога о нас.
Человеческую немощь понесый, впери силою немощь твою на некрепкаго змия. Тем, мученице, на землю низвергла еси, верно зовущи: яко несть свят, паче Тебе, Господи.
Слава: Потоки изсушила еси беззакония струями кровей твоих, блаженная, сладости же потока ныне наслаждаешися и во свете невечернем обитаеши, зовущи: яко несть свят паче Тебе, Господи.
И ныне: Зачатие и рождество Твое паче слова, веки бо Создавшаго словом родила еси, избавльшаго безсловесия мира концы, Отроковице неискусомужная, Егоже моли всегда, еже спасти нас.

Моли Бога о нас, святая мученице Татиано, яко мы усердно к тебе прибегаем, скорой помощнице и молитвеннице о душах наших. (Поклон.).

Господи помилуй. (Трижды.)
Седален, глас 4
Сугуб совершивши, мученице, подвиг на земли, сугуб и венец сподобилася еси прияти от руки Жениха твоего, постилася бо еси, страсти плотския обуздающи, пострадавши же законно, врага низложила еси. Темже мольбами твоими спаси ны от напастей.
Слава, и ныне, Богородичен: Скоро приими, Владычице, молитвы наша, и сия принеси Сыну Твоему и Богу, Госпоже всепречистая, разруши обстояния, к Тебе притекающих, разсыпли приседания и дерзости, Дево, ныне вооружающихся на рабы Твоя.
Песнь 4
Ирмос: Пою Тя, слухом бо, Господи, услышах и ужасохся, до мене бо идеши, мене ища, заблуждшаго. Тем многое Твое снизхождение, еже на мя, прославляю, Многомилостиве.
Святая мученице Татиано, моли Бога о нас.
Красно душевное устроение, благолепием благочестия Татиана носящи, еще же мучения светом преславно сияющи, к чистому Жениху вселяется.
Святая мученице Татиано, моли Бога о нас.
Железом твое лице стружущия пребеззаконныя невидением небеснии Ангели мучаху, посланник к твоей от Бога, мученице, помощи, иже твоему терпению удивишася.
Слава: Законно Христа проповедающи, победила еси пребеззаконнующия, жертва же непорочна, благоприятна, совершеннейшая Тому принеслася еси, взывающи: Тебе любящи, Спасе, закалаюся.
И ныне: Ко пристанищу тихому мя направи, Богоневесто всесвятая: буря бо мя волнует и смущение греха люте, ветры колеблемь лукавых духов оскорбляющих мя.

Моли Бога о нас, святая мученице Татиано, яко мы усердно к тебе прибегаем, скорой помощнице и молитвеннице о душах наших. (Поклон.).
Песнь 5
Ирмос: Просвещение во тьме лежащих, спасение отчаянных, Христе Спасе мой, к Тебе утренюю, Царю мира, просвети мя сиянием Твоим: иного бо, разве Тебе, Бога не знаю.
Святая мученице Татиано, моли Бога о нас.
Твою честную и блаженную страсть подражающи, безстрастием Тебе сочтавшаяся, страждет преусердно, на уды ссекаемая, Жизнодавче Христе, зовущи: иного, разве Тебе, Бога не знаю.
Святая мученице Татиано, моли Бога о нас.
Страх Божий во утробе мыслию приемши, дух спасительнаго исповедания и мучения родила еси преславно, доблемудрая, твердым страданием и сопротивная начала посрамила еси.
Слава: Светлыми сияеши зарями, уясняема Духа Святаго светолитием, и озаряеши верных сердца, греховный мрак разоряющи, мученице, страстотерпице Христова досточудная.
И ныне: Светлый Солнца облаче, осияй ми зарю, решащу мрак моих прегрешений, даждь ми руку, впадшему в тину греховную, воздвигни мя лежащаго, едина падшаго Адама исправление.

Моли Бога о нас, святая мученице Татиано, яко мы усердно к тебе прибегаем, скорой помощнице и молитвеннице о душах наших. (Поклон.).
Песнь 6
Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи.
Святая мученице Татиано, моли Бога о нас.
На древе яко позна простерта Тя мученица честная, терпит повешение и строгания телесная, за любовь Твою, Всемощне.
Святая мученице Татиано, моли Бога о нас.
Свирепейшии зверие устыдешася посреди тризнища мужески страждущия тя, якоже Феклы первее первомученицы , еяже ревность стяжала еси, приснопамятная.
Слава: Представше небеснии Ангели посреди темницы, тя светом осияша, от болезней изымающе, и яко Божию агницу прославляюще.
И ныне: От всех родов избра Тя доброту Иаковлю, Юже возлюби Творец, Всенепорочная, и из Тебе возсияв явися.

Моли Бога о нас, святая мученице Татиано, яко мы усердно к тебе прибегаем, скорой помощнице и молитвеннице о душах наших. (Поклон.).

Господи помилуй. (Трижды.) Слава, и ныне.
Кондак, глас 4
Светло во страдании твоем возсияла еси, страстотерпице, от кровей твоих преиспещрена, и яко красная голубица к небеси возлетела еси, Татиано. Темже моли присно за чтущия тя.
Песнь 7
Ирмос: Богопротивное веление беззаконнующаго мучителя, высок пламень вознесло есть. Христос же простре богочестивым отроком росу духовную, Сый благословен и препрославлен.
Святая мученице Татиано, моли Бога о нас.
Благомощно непобедимая сечема сосцев отъятие претерпела еси терпеливейше, огнем же небесным, мученице, попалила еси чтити не хотящия Бога, Егоже вся тварь поет славящи.
Святая мученице Татиано, моли Бога о нас.
В сердцы носящи огнь божественный любве, непорочная, пламень попра, огня подоборабнаго не ужасеся, отроков образующи древних и мужество и крепость.
Слава: Зверей сверепство тебе повинеся, львов зияния невредно преминула еси, Богу тя прославльшу, Того прославившую, Егоже страдания твоею исполняющи плотию, всехвальная.
И ныне: Жизнь ипостасную нам рождши, смертию смерть яве потребльшую, страсти умертви плоти нашея, верою чтущих Тя, Чистая, яко Богородицу и Всеславную.

Моли Бога о нас, святая мученице Татиано, яко мы усердно к тебе прибегаем, скорой помощнице и молитвеннице о душах наших. (Поклон.).
Песнь 8
Ирмос: В пещь огненную ко отроком еврейским снизшедшаго, и пламень в росу преложшаго Бога, пойте, дела, яко Господа, и превозносите во вся веки.
Святая мученице Татиано, моли Бога о нас.
Удобрившися добродетельми, украсилася еси добротами мучения, и Жениху обручилася еси, паче всех человеков краснейшему, добротою сияющему безсмертия, Татиано Богомудрая.
Святая мученице Татиано, моли Бога о нас.
С безплотными слугами в темнице Творца славословила еси, сияющи славою божественнаго блистания, и всем неприступна пребывающи, держимым тьмою прелести.
Слава: Сокрушение твоих удес истни врагов коварства, кровей течение нечестия лютыя потоки, честная, изсуши, пучина чудес нам явльшися.
И ныне: Спаси, ущедри ны, щедраго Бога нам Спаса рождшая паче слова, огнепальных помышлений и страстей изымающи зноя, Твоими молитвами, Чистая Препрославленная.

Моли Бога о нас, святая мученице Татиано, яко мы усердно к тебе прибегаем, скорой помощнице и молитвеннице о душах наших. (Поклон.).
Песнь 9
Ирмос: От Бога Бога Слова, неизреченною мудростию пришедшаго обновити Адама, ядию в тление падшаго люте, от Святыя Девы неизреченно воплотившагося нас ради, вернии, единомудренно песньми величаем.
Святая мученице Татиано, моли Бога о нас. (Поклон)
По многих муках мечным тя судом лютый осуждает судия, еяже восхождению восплескаша небеснии чини. Христос же всесильною десницею венча тя, мученице, законно пострадавшую.
Святая мученице Татиано, моли Бога о нас.
Сочтася с мученическими светлейшими стады, яснейши приближившися Богу, видиши яже видят Ангели, яко дева в чертозе водворяешися, Жениха твоего, честная, молящи, спастися любовию тя почитающим.
Слава: Запечатанный источник тя, заключен же оград, возложение честно и священно, невесту Христову нетленную, заколение и жертву, агницу и добрую голубицу Владыки всяческих, Татиано, проповедуем.
И ныне: Гласы прекланяема тепле Тя молящих, едина верных прибежище, спаси, ущедри, Владычице, соблюди от вреда, и всякаго языков нашествия, верою и любовию присно Тя величающия.

Моли Бога о нас, святая мученице Татиано, яко мы усердно к тебе прибегаем, скорой помощнице и молитвеннице о душах наших. (Поклон.).

Edited by Макарий ***, 8 year(s) ago
Posted at 01:22 on 25/01/2012
Святая мученице Татиано, моли Бога о нас!
[User Deleted]
Posted at 18:18 on 25/01/2012
Моли Бога о нас, святая мученице Татиано, яко мы усердно к тебе прибегаем, скорой помощнице и молитвеннице о душах наших. аминь
 
Интернет-магазин икон "Главикона.ру"

 Помощь Свято-Троицкому храму