Богослужебные тексты, службы (видео и текст)
» Каноны на повечерии - Неделя
к Дискуссиям
|
Каноны на повечерии
(в неделю) Песнь 1 Ирмос: Во глубине постла иногда фараонитское всевоинство преоруженная сила, воплощ-шееся же Слово всезобный грех потребило есть, препрославленный Господь, славно бо прославися. Иисусе Сладчайший, спаси мя. Иисусе Сладчайший, Христе, Иисусе долготерпеливе, души моея язвы исцели Иисусе, и услади сердце мое многомилостиве, молюся, Иисусе Спасе мой, да величаю Тя спасаемый. Иисусе Сладчайший, спаси мя. Иисусе Сладчайший, Христе, Иисусе отверзи покаяния ми дверь, Человеколюбче Иисусе, и приими мя Тебе припадающа и тепле просяща, Иисусе Спасе мой, согрешений прощения. Иисусе Сладчайший, спаси мя. Иисусе Сладчайший, Христе, Иисусе исхити мя из руки льстиваго велиара, Иисусе, и сотвори деснаго предстоятеля славы Твоея, Иисусе Спасе мой, части шуия мя избавляй. Пресвятая Богородице, спаси нас. Иисуса рождшая Бога, Владычице, моли о непотребных рабех Пречистая, яко да муки молитвами Твоими избавимся Нескверная, оскверненнии, славы присносущныя наслаждающеся. Пресвятая Богородице, спаси нас. Многими содержим напастьми, к Тебе прибегаю, спасения иский Мати Слова и Дево, от тяжких и лютых мя спаси. Пресвятая Богородице, спаси нас. Страстей мя смущают прилози, многаго уныния исполнити мою душу: умири Отроковице, тишиною Сына и Бога Твоего Всенепорочная. Пресвятая Богородице, спаси нас. Спаса рождшую Тя и Бога, молю Дево, избавитися ми лютых: к Тебе прибегая, простираю и душу и помышление. Пресвятая Богородице, спаси нас. Недугующа телом и душею, посещения Божестеннаго и промышления от Тебе сподоби Едина Богомати, яко Благая, Благаго же Родительнице. Святии Архангели и Ангели, молите Бога о нас. Вси воспоим, людие, вся направляющую невещественныя лики вышняго чиноначалия, Троицу Несозданную, поюще: свят, свят, свят еси, Боже Вседержителю. Святии Архангели и Ангели, молите Бога о нас. Положил еси тварем начаток существо безплотное, Творче Ангелов, Пречистый Твой Престол окружающа, звати Ти: свят, свят, свят еси, Боже Вседержителю. Святии Архангели и Ангели, молите Бога о нас. Радуйся, Гаврииле, Божия воплощения возвестителю, Михаиле же, чинов невещественных предстателю, непрестанно зовуще: свят, свят, свят еси, Боже Вседержителю. Пресвятая Богородице, спаси нас. Трепещу таинства, Христе, Твоего схождения, яко иже естеством Бог, приял еси от Девы родитися яко человек, да спасеши мир от работы сопротивнаго. Господи Иисусе Христе Боже мой, помилуй мя. Песнь воспети и восхвалити, Спасе, Твоего раба достойно сподоби, безплотному Ангелу, наставнику и хранителю моему. Святый Ангеле Божий, хранителю мой, моли Бога о мне. Един аз в неразумии и в лености ныне лежу, настав-ниче мой и хранителю, не остави мене погибающа. Слава Отцу и Сыну и Святому Духу: Ум мой Твоею молитвою направи, творити ми Божия повеления, да получу от Бога отдание грехов, и ненавидити ми злых настави мя, молюся ти. И ныне и присно и во веки веков: Молися, Девице, о мне рабе Твоем, ко благодателю, со хранителем моим Ангелом, и настави мя творити заповеди Сына Твоего и Творца моего. Песнь 3 Ирмос: На камени мя веры утвердив, разширил еси уста моя на враги моя, возвесели бо ся дух мой внегда пети: несть свят якоже Бог наш, и несть праведен паче Тебе Господи Иисусе Сладчайший, спаси мя. Услыши Человеколюбче Иисусе мой раба Твоего, вопиюща во умилении: и избави мя Иисусе, осуждения и муки, едине долготерпеливе, Иисусе Сладчайший, Многомилостиве. Иисусе Сладчайший, спаси мя. Подъими раба Твоего Иисусе мой, припадающа со слезами, Иисусе мой, и спаси Иисусе мой кающагося мя, и гиены Владыко избави, Иисусе Сладчайший, Многомилостиве. Иисусе Сладчайший, спаси мя. Время, Иисусе мой, еже дал ми еси, во страсти иждих, Иисусе мой, темже Иисусе мой, не отвержи мя, но воззови, молюся, Владыко, Иисусе Сладчайший, и спаси. Пресвятая Богородице, спаси нас. Дево рождшая Иисуса моего, моли избавити мя геены, едино предстательство оскорбляемых Богоблагодатная, и сподоби мя жизни, всенепорочная, нестареющияся. Пресвятая Богородице, спаси нас. Предстательство и покров жизни моея полагаю Тя Богородительнице Дево: Ты мя окорми ко пристанищу Твоему, благих виновна, верных Утверждение, едина Всепетая. Пресвятая Богородице, спаси нас. Молю Дево, душевное смущение, и печали моея бурю разорити: Ты бо богоневестная, Начальника тишины Христа родила еси, Едина Пречистая. Пресвятая Богородице, спаси нас. Благодетеля рождши добрых виновнаго, благодеяния богатство всем источи: вся бо можеши, яко сильнаго в крепости Христа рождши, Богоблаженная. Пресвятая Богородице, спаси нас Лютыми недуги, и болезненными страстьми истязаемому Дево, Ты ми помози: исцелений бо неоскудное Тя знаю сокровище, Пренепорочная, неиждиваемое. Святии Архангели и Ангели, молите Бога о нас. Крепостию уставил еси, безсмертне, сильныя, совершающия Пресвятое Твое хотение, Тебе в вышних всегда предстоящия. Святии Архангели и Ангели, молите Бога о нас. Ходатаи Твоего вочеловечения и честнаго востания, ангельския чиноначальники, Христе, за ны приими молящияся. Святии Архангели и Ангели, молите Бога о нас. Ангелы приставил еси хранители человеком, яко благоутробен, служители же показал еси, Христе, спасения Твоим угодником. Пресвятая Богородице, спаси нас. Неизречено рождши, Богоневесто, Спаса и Господа, избави нас от тли, Тя воистинну призывающих. Святый Ангеле Божий, хранителю мой, моли Бога о мне. Все помышление мое и душу мою к тебе возложих, хранителю мой; ты от всякия мя напасти вражия избави. Святый Ангеле Божий, хранителю мой, моли Бога о мне. Враг попирает мя, и озлобляет, и поучает всегда творити своя хотения; но ты наставниче мой, не остави мене погибающа. Слава: Пети песнь с благодарением и усердием Творцу и Богу даждь ми, и тебе, благому Ангелу хранителю моему: избавителю мой, изми мя от враг озлобляющих мя. И ныне: Исцели, Пречистая, моя многонедужныя струпы, яже в души, прожени враги, иже присно борются со мною. Господи, помилуй; (трижды). Седален, глас 1: Спасе мой Иисусе, блуднаго спасый, Спасе мой Иисусе, приемый блудницу, и мене ныне помилуй, Иисусе многомилостиве: спаси, ущедри, о Иисусе Благодетелю, якоже благоутробне Манассию Иисусе мой, Яко един Человеколюбец. Седален, глас 8-й Небесных начальниче и первостоятелю высокопрестольных и страшных Божественныя славы, Михаиле Архистратиже, Ангелом чиноначальниче, со всеми безплотными, Емуже служиши Владыце, о всем мире непрестанно молися и испроси оставление грехов, и милость и благодать обрести в день судный. Седален, глас 2: От любве душевныя вопию ти, хранителю моея души, всесвятый мой Ангеле, покрый мя и соблюди от лукаваго ловления всегда, и жизни настави небесней, вразумляя и прсвещая и укрепляя мя. Слава и ныне: Богородице безневестная Пречистая, Яже без Семене рождшая всех Владыку, Того со Ангелом хранителем моим моли избавити ми ся всякаго недоумения, и дати умиление и свет души моей и согрешением очищение, яже едина вскоре заступающи. Песнь 4 Ирмос: Пришел еси от Девы, не ходатай, ни ангел, но Сам Господи воплощься, и спасл еси всего мя человека; тем зову Ти: слава Силе Твоей Господи. Иисусе Сладчайший, спаси мя. Исцели Иисусе мой, души моея язвы, Иисусе мой молюся, и руки мя исхити Иисусе мой благоутробне, душетленнаго велиара. И спаси. Иисусе Сладчайший, спаси мя. Согреших, Иисусе мой Сладчайший благоутробне, Иисусе мой спаси мя, прибегающаго к покрову Твоему, Иисусе Долготерпеливе, и Царствия Твоего мя сподоби. Иисусе Сладчайший, спаси мя. Никтоже согреши, Иисусе мой, якоже согреших аз окаянный: но припадаю моляся, Иисусе мой, спаси мя, и жизни, Иисусе мой, наследие ми даруй. Пресвятая Богородице, спаси нас. Всепетая Иисуса рождшая, Господа, Того моли избавити муки вся поющия Тя, и Богородицу воистину именующыя. Пресвятая Богородице, спаси нас. Страстей моих смущение, кормчию рождшая Господа, и бурю утиши моих прегрешений, Богоневестная. Пресвятая Богородице, спаси нас. Милосердия Твоего бездну призывающу подаждь ми, яже благосрдаго рождшая и Спаса всех поющих Тя. Пресвятая Богородице, спаси нас. Наслаждающееся, Пречистая, Твоих дарований, благодарственное воспеваем пение, ведуще Тя Богоматерь. Пресвятая Богородице, спаси нас. На одре болезни моея и немощи неизлезащу ми, яко благолюбива помози Богородице, едина Приснодево. Пресвятая Богородице, спаси нас. Надежду и утверждение, и спасение стену недвижиму, имуще Тя Всепетая, неудобства всякаго избавляемся. Святии Архангели и Ангели, молите Бога о нас. Всел еси на Ангелы, якоже на кони, Человеколюбче, и приял рукою Твоею вожда их, и спасение бысть еждение Твое верно Ти вопиющим: слава силе Твоей, Господи. Святии Архангели и Ангели, молите Бога о нас. Покрывает Ангелы добродетель Твоя, Безсмертне, и земныя исполняет концы Твоего славнаго, Безначальне, Божественнаго хваления: с нимиже Тебе вопием: слава силе Твоей, Господи. Святии Архангели и Ангели, молите Бога о нас. Изшел еси, Щедре, на спасение людем Твоим, Христе: созываевши же други, силы Твоя, и веселие бысть во спасении Твоем безвещным, вопиющим: слава силе Твоей, Господи. Пресвятая Богородице, спаси нас. Дева и Мати паче естества явилася еси, Пречистая, яко Бога, Тогоже и Человека Христа родила еси, от Ангел хвалимаго: людей Твоих печаль переложи на радость моливами Твоими. Святый Ангеле Божий, хранителю мой, моли Бога о мне. Моли Человеколюбца Бога ты, хранителю мой, и не остави мене, но присно в мире житие мое соблюди и подаждь ми спасение необоримое. Святый Ангеле Божий, хранителю мой, моли Бога о мне. Яко заступника и хранителя животу моему прием тя от Бога, Ангеле, молю тя святый, от всяких мя бед свободи. Слава: Мою скверность Твоею святынею очисти, хранителю мой, и от части шуия да отлучен буду молитвами твоими и причастник славы явлюся. И ныне: Недоумение предлежит ми от обышедших ми зол, Пречистая, но избави мя от них скоро: к Тебе бо единей прибегох. Песнь 5 Ирмос: Просвещение во тьме лежащих, спасение отчаянных Христе Спасе мой, к Тебе утреннюю Царю мира, просвети мя спасением Твоим, инаго бо разве Тебе Бога не знаю. Иисусе Сладчайший, спаси мя. Ты просвещение, Иисусе мой, ума моего, Ты спасение отчаянныя души моея Спасе, Ты Иисусе мой муки избави, и гиены+ мя зовуща: спаси Иисусе мой Христе мя, окаяннаго. Иисусе Сладчайший, спаси мя. Всеконечне, Иисусе мой, к страсти безчестия низвержен ныне зову: Ты Иисусе мой, помощи ми руку низпослав, исторгни зовуща: спаси, Иисусе мой Христе, мя окаяннаго. Иисусе Сладчайший, спаси мя. Осквернен ум, Иисусе мой, обнося взываю Ти: очисти мя от скверны прегрешений, и избави мя во глубину злобы от неведения низпополшагося, Спасе Иисусе мой, и спаси мя, молюся. Пресвятая Богородице, спаси нас. Иисуса рождшая Отроковице Богородительнице, Того умоли спасти вся православныя, монахи и мирския, и гиены избавити зовущыя: разве Тебе предстательства твердаго не знаем. Пресвятая Богородице, спаси нас. Исполни, Чистая, веселия сердце мое, Твою нетленную дающи радость, веселия рождшая виновнаго. Пресвятая Богородице, спаси нас. Избави нас от бед, Богородице чистая, вечное рождши избавление, и мир всяк ум преимущий. Пресвятая Богородице, спаси нас. Разреши мглу прегрешений моих, Богоневесто, просвещением Твоея светлости, Свет рождшая божественный и превечный. Пресвятая Богородице, спаси нас. Исцели, Чистая, души моея неможение, посещения Твоего сподобльшая, и здравие молитвами Твоими подаждь ми. Святии Архангели и Ангели, молите Бога о нас. Невозвратным желанием всегда к высоте, Христе, носими, крайнее всех желание, ангельския силы непрестанно славят. Святии Архангели и Ангели, молите Бога о нас. Ты разумныя по существу, нетленныя благодатию Твоею, Христе, поставил еси певцы Твоему величествию, Ангелы Твоя по образу соделав, Непостижиме. Святии Архангели и Ангели, молите Бога о нас. Ты непреклонны на горшая, к Тебе приближением, Христе, сохранил еси Твоя слуги: источник бо благости Ты еси, благотворя достойно Ти служащим. Пресвятая Богородице, спаси нас. Умерщвленную мою душу страстьми мерзкими, Всенепорочная, оживи, животу Хранителя рождши, и к стезе вечней и блаженному житию устреми. Святый Ангеле Божий, хранителю мой, моли Бога о мне. Яко ямея дерзновение к Богу, хранителю мой святый, Сего умоли от оскорбляющих мя зол избавити. Святый Ангеле Божий, хранителю мой, моли Бога о мне. Свете светлый, светло просвети душу мою, наставниче и хранителю от Бога данный ми Ангеле. Слава: Спяща мя зле тяготою греховною, яко бдяща сохрани, Ангеле Божий, и возстави мя на славословие молением Твоим. И ныне: Марие, Госпоже Богородице безневестная, надеждо верных, вражия возношения низложи, поющия же Тя возвесели. Песнь 6 Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи. Иисусе Сладчайший, спаси мя. Иисусе мой Христе Многомилостиве, исповедающася приими мя Владыко, о Иисусе, и спаси мя, и от тли, Иисусе, мя исхити. Иисусе Сладчайший, спаси мя. Иисусе мой, никтоже бысть ин блудник, якоже аз страстный, о Иисусе Человеколюбче: но Ты, Иисусе, мя спаси. Иисусе Сладчайший, спаси мя. Иисусе мой, блудницу, блуднаго, и Манассию и мытаря преидох, о Иисусе мой, страстьми, и разбойника Иисусе, и неневитяны. Пресвятая Богородице, спаси нас. Иисуса Христа моего рождшая Пречистая Дево, едина нескверная, осквернена суща мя молитв Твоих иссопом ныне очисти. Пресвятая Богородице, спаси нас. Смерти и тли яко спасл есть, сам ся издав смерти, тлением и смертию мое естество ято бывшее Дево моли Господа и Сына Твоего, врагов злодействия мя избавити. Пресвятая Богородице, спаси нас. Предстательницу Тя живота вем, и хранительницу тверду Дево, и напастей решащу молвы, и налоги бесов отгоняющу: и молюся всегда, от тли страстей моих избавити мя. Пресвятая Богородице, спаси нас. Яко стену прибежища стяжахом, и душ всесовершенное спасение, и пространство в скорбех, Отроковице, и просвещением Твоим присно радуемся: о Владычице, и ныне нас от страстей и бед спаси. Пресвятая Богородице, спаси нас. На одре ныне немощствуяй лежу, и несть исцеления плоти моей: но Бога и Спаса миру, и Избавителя недугов рождшая, Тебе молюся Благой: от тли недуг возстави мя. Святии Архангели и Ангели, молите Бога о нас. Боголепно от несущества, Господи, словом привел еси существа Небесных, Безсмертне, воинств, световидны сих соделовая. Святии Архангели и Ангели, молите Бога о нас. Служителие честнии Божия хваления бысте, безплотнии, граждане Небеснии, и Божественная воистинну скиния, Творцу достойно служаще. Пресвятая Богородице, спаси нас. Всепетая, Света порождши, всем свет дающаго, тму моих прегрешений, Чистая, отжени Матерними Твоими к Нему молитвами. Святый Ангеле Божий, хранителю мой, моли Бога о мне. Всяких мя напастей свободи, и от печали спаси, молюся ти, святый Ангеле, данный мне от Бога, хранителю мой добрый. Святый Ангеле Божий, хранителю мой, моли Бога о мне. Освяти ум мой блаже, и просвети мя, молюся ти, святый Ангеле, и мыслити ми полезная всегда настави мя. Слава: Устави сердце мое от настоящего мятежа, и укрепи мя во благих, хранителю мой, и настави мя чудно к тишине животней. И ныне: Слово Божие в Тя вселися,Богородице, и человеком Тя показа небесную лествицу; Тобою бо к нам Вышний сошел есть. Господи, помилуй; (трижды). Кондак, глас 8: Возбранный Воеводо и Господи, ада победителю, яко избавлься от вечныя смерти, похвальная восписую Ти, создание и раб Твой: но яко имеяй милосердие неизреченное, от всяких мя бед свободи, зовуща: Иисусе Сыне Божий, помилуй мя. Икос: Ангелов Творче и Господи сил, отверзи ми недоменный ум и язык на похвалу пречистаго Твоего имене, якоже глухому и гугнивому древле слух и язык отверзл еси, и глаголаше зовый таковая: Иисусе пречудный, Ангелов удивление; Иисусе пресильный, прародителей избавление. Иисусе пресладкий, патриархов величание: Иисусе преславный, царей укрепление, Иисусе прелюбимый, пророков исполнение: Иисусе предивный, мучеников крепосте, Иисусе претихий, монахов радосте: Иисусе премилостивый, пресвитеров сладосте, Иисусе премилосердый, постников воздержание: Иисусе пресладостный, преподобных радование, Иисусе пречестный, девственных целомудрие: Иисусе предвечный, грешников спасение, Иисусе Сыне Божий, помилуй мя. Кондак, глас 2й Архистратизи Божии, служителие Божественныя славы, Ангелов начальницы и человеков наставницы, полезное нам просите и велию милость, яко безплотных Архистратизи. Икос Рекл еси, Человеколюбче, в писаниих Твоих, множеству радоватися Ангел о человеце единем кающемся, Безсмертне: тем и мы в беззаконниих суще, безгрешне Едине Сердцеведче, Тя молити всегда дерзаем яко благоутробнаго, ущедрити нас и послати недостойным умиление, Владыко, и подати нам прощение грехов: о всех бо нас молятся Тебе, яко безплотных Архистратизи. Кондак, глас 4: Явися мне милосерд, святый Ангеле Господень, хранителю мой, и не отлучайся от мене сквернаго, но просвети мя светом неприкосновенным и сотвори мя достойна Царствия Небеснаго. Икос: Слава: Уничиженную душу мою многими соблазны, ты святый предстателю, неизреченныя славы небесныя сподоби, и певец с лики безплотных сил Божиих, помилуй мя и сохрани, и помыслы добрыми душу мою просвети, да твоею славою, Ангеле мой, обагащуся, и низложи зломыслящия мне враги, и сотвори мя достой на Царствия Божия. И ныне: Предстательство христиан непостыдное, ходатайство ко Творцу непреложное, не презри грешных молений гласы, но предвари яко Благая на помощь нас, верно зовущих Ти: ускори на молитву, и потщийся на умоление, предстательствующи присно Богородице чтущих Тя. Песнь 7 Ирмос: Образу златому на поле Деире служимому, трие Твои отроцы небрегоша безбожнаго веления,посреде же огня ввержени, орошаеми пояху: благословен еси Боже отец наших. Иисусе Сладчайший, спаси мя. Христе Иисусе, никтоже согреших на земли от века, о Иисусе мой, якоже согреших аз окаянный и блудный, темже Иисусе мой, вопию Ти: поюща мя ущедри, благословен еси Боже отец наших. Иисусе Сладчайший, спаси мя. Христе Иисусе, ко страху Твоему, вопию, пригвозди мя, о Иисусе мой, и окорми ныне ко пристанищу благоотишному, яко да, Иисусе мой щедре, пою Ти спасаемый: благословен еси Боже отец наших. Иисусе Сладчайший, спаси мя. Христе Иисусе, тьмами обещах Тебе страстный, о Иисусе мой, покаяние, но солгах окаянный; темже Иисусе мой, вопию Ти: нечувствнне пребывающую душу мою просвети Христе отцев Боже благословен еси. Пресвятая Богородице, спаси нас. Христа Иисуса рождшая странно, и паче естества, Того моли Всенепорочная, яже чрез естество моя прегрешения вся простити ми Отроковице, да зову спасаем: благословена еси, Бога плотию рождшая. Пресвятая Богородице, спаси нас. Наше спасение якоже восхотел еси Спасе устроити, во утробу Девыя вселился еси, юже миру предстательницу показал еси: отец наших Боже, благословен еси. Пресвятая Богородице, спаси нас. Волителя милости, Егоже родила еси, Мати чистая умоли, избавитися от прегрешений и душевных скверн, верою зовущим: отец наших Боже, благословен еси. Пресвятая Богородице, спаси нас. Сокровище спасения, и источник нетления Тя рождшую, и столп утверждения, и дверь покаяния, зовущим показал еси: отец наших Боже, благословен еси. Пресвятая Богородице, спаси нас. Телесныя слабости и душевныя недуги Богородительнице любовию приступающих к крову Твоему Дево, исцелити сподоби, Спаса Христа нам рождшая. Святии Архангели и Ангели, молите Бога о нас. Светы явил еси, Щедре, Ангел Твоих невещественное существо, неизреченнаго света исполняемы, непрестанно зовущия: благословен еси, Господи Боже, во веки. Святии Архангели и Ангели, молите Бога о нас. Емуже предстоят непрестанно служаща тмы ангельския, лица же зрети не терпят Божества: благословен еси, зовуща, Боже, во веки. Святии Архангели и Ангели, молите Бога о нас. Словом Твоим ипостасным, Господи, ангельское естество соделал еси, освятив же Божественным Духом, Троицу богословити научил еси, Боже, во веки. Пресвятая Троице, Боже наш, слава Тебе. Три убо зряще сущия Ипостаси, неописанное славим Существо, Отца и Слова со Духом, вопиюще: благословен еси, Господи Боже отец наших. Святый Ангеле Божий, хранителю мой, моли Бога о мне. Милостив буди ми и умоли Бога, Господень Ангеле, имею бо тя заступника во всем животе моем, наставника и хранителя, от Бога дарованнаго ми во веки. Святый Ангеле Божий, хранителю мой, моли Бога о мне. Не остави в путь шествующия души моея окаянныя убити разбойником, святый Ангеле, яже ти от Бога предана быть непорочне; но настави ю на путь покаяния. Слава: Всю посрамлену душу мою привожду от лукавых ми помысл и дел: но предвари, наставниче мой, и исцеление ми подаждь благих помысл, уклоняти ми ся всегда на правыя стези. И ныне: Премудрости исполни всех и крепости Божественныя, Ипостасная Премудросте Вышняго, Богородицы ради, верою вопиющих: отец наших Боже, благословен еси. Песнь 8 Ирмос: В пещь огненную ко отроком еврейским снизшедшаго, и пламень в, росу преложшаго Бога, пойте дела яко Господа, и превозносите во вся веки. Иисусе Сладчайший, спаси мя. Тя Иисусе мой молю, якоже блудницу, Иисусе мой, избавил еси от многих согрешений, тако и мене, Иисусе Христе мой, избави, и очисти оскверненную душу мою, Иисусе мой. Иисусе Сладчайший, спаси мя. Преклонився, Иисусе, безсловесными сластьми, безсловесен явихся, и скотом воистину уподобихся, Спасе: темже Иисусе, безсловесия мя избави. Иисусе Сладчайший, спаси мя. Впад, о Иисусе в душетленныя разбойники, обнажихся одежды, Иисусе мой, боготканныя ныне, и лежу ранами уязвлен: елей Христе мой, возлей на мя и вино. Пресвятая Богородице, спаси нас. Иисуса моего и Бога носившая Христа несказанно, Богородице Марие, Того моли присно, от бед спастися рабом Твоим и певцем Твоим, неискусомужная Дево. Пресвятая Богородице, спаси нас. Помощи яже от Тебе требующыя, не презри Дево, поющыя, и превозносящыя Тя во веки. Пресвятая Богородице, спаси нас. Неможение души моея исцеляеши, и телесныя болезни, Дево, да Тя прославлю во веки. Пресвятая Богородице, спаси нас. Исцелений богатство изливаеши, верно поющым Тя Дево, и превозносящым неизреченное Твое рождество. Пресвятая Богородице, спаси нас. Напастей Ты прилоги отгоняеши, и страстей находы, Дево: темже поем Тя поем во вся веки. Святии Архангели и Ангели, молите Бога о нас. Ангельскому поревнуем житию и разум вперим к высоте, и с ними невещественно воспоем Господа и превозносим во веки. Святии Архангели и Ангели, молите Бога о нас. Ликовственницы лика Небеснаго, иже Престол обстояще славы, о Бозе всегда обращаеми, Ангели поют и славословят во вся веки. Святии Архангели и Ангели, молите Бога о нас. Невещественна огня творящей пламы, на высоте непрестанно служащих, и Ангелы духи являющей, Троице покланяемся и славословим во вся веки. Пресвятая Богородице, спаси нас. Иже во утробу всельшася Девы, и от Сея странно и выше слова, древняго Адама наздавша, Господа поем и славословим во веки. Святый Ангеле Божий, хранителю мой, моли Бога о мне. От Бога посланный, утверди живот мой, раба твоего, преблагий Ангеле, и не остави мене во веки. Святый Ангеле Божий, хранителю мой, моли Бога о мне. Ангела тя суща блага, души моея наставника и хранителя, преблаженне, воспеваю во веки. Слава: Буди ми поров и забрало в день испытания всех человек, воньже огнем искушаются дела благая и злая. И ныне: Буди ми помощница и тишина, Богородице Приснодево, рабу Твоему, и не остави мене лишена быти Твоего владычества. Песнь 9 Ирмос: От Бога Бога Слова, неизреченною мудростию пришедшаго обновити Адама, ядию в тление падшаго люте, от святыя Девы неизреченно воплотившагося нас ради, вернии единомудренно песньми величаем. Иисусе Сладчайший, спаси мя. Манассию Иисусе мой, мытаря, блудницу, блуднаго, щедре Иисусе, и разбойника преидох, Иисусе мой, в делех студных и безместных Иисусе: но Ты Иисусе мой предварив мя спаси. Иисусе Сладчайший, спаси мя. От Адама, Иисусе мой, согрешившыя вся, прежде закона и в законе, Иисусе, и по законе окаянный, и благодати, Иисусе мой, победих страстьми окаянно: но Ты, Иисусе мой, судьбами Твоими спаси мя. Иисусе Сладчайший, спаси мя. Да не отлучен буду, Иисусе мой, неизреченныя Твоея славы, да не улучу части, Иисусе, шуия, Сладчайший Иисусе, но Ты мя десным овцам Твоим, Христе Иисусе мой, сочетав упокой, яко благоутробен. Пресвятая Богородице, спаси нас. Иисуса Богородице, Егоже носила еси едина неискусомужная Дево Марие, Того Чистая умилостиви, яко Сына Твоего и зиждителя, избавити притекающыя к Тебе искушений и бед, и огня будущаго. Пресвятая Богородице, спаси нас. Тока слез моих не отвратися, яже от всякаго лица всяку слезу отъемшаго, Дево, Христа рождшаго. Пресвятая Богородице, спаси нас. Радости мое сердце исполнити Дево, яже радости приемшая исполнение, греховную печаль потрелябляющи. Пресвятая Богородице, спаси нас. Пристанище и предстательство Тебе прибегающих буди Дево, и стена нерушимая, прибежище же, и покров и веселие. Пресвятая Богородице, спаси нас. Света Твоего зарями просвети Дево, мрак неведения отгоняющи, благоверно Богородицу Тя исповедающих. Пресвятая Богородице, спаси нас. На месте озлобления немощи смирившагося, Дево исцели из нездравия во здравие претворяющи. Святии Архангели и Ангели, молите Бога о нас. Тя, неизреченно совокупившаго Небесным, Христе, земная, и едину Церковь совершивша Ангелом и человеком, непрестанно величаем. Святии Архангели и Ангели, молите Бога о нас. Ангели и Архангели, Престоли, Власти же и Господствия, Начала и Силы, и Херувими и Серафими, с Богородицею о мире молитеся. Пресвятая Троице, Боже наш, слава Тебе. Тя, Троице, славим, от небытия вся сотворившую, и чины ангельския украсившую, и Божественными зарями просветившую концы. Пресвятая Богородице, спаси нас. Радуйся, святая Богоневесто, радуйся, Свет мирови рождши верным, радуйся, стено и покрове всех нас. Бога, яко благодателя, за ны непрестанно моли. Господи Иисусе Христе Боже мой, помилуй мя. Помилуй мя, едине Спасе мой, яко милостив еси и милосерд, и праведных ликов сотвори мя причастника. Святый Ангеле Божий, хранителю мой, моли Бога о мне. Мыслити ми присно и творити, Господень Ангеле, благая и полезная даруй, яко сильна яви в немощи и непорочна. Слава: Яко имея дерзновение к Царю Небесному, Того моли, с прочими безплотными, помиловати мя окаяннаго. И ныне: Много дерзновение имущи, Дево, к Воплощшемуся из Тебе, преложи мя от уз и разрешение ми подаждь и спасение, молитвами Твоими. Молитвы: Ко Господу нашему Иисусу Христу. Владыко Господи Иисусе Христе Боже мой, иже неизреченнаго ради Твоего человеколюбия, на конец веков во плоть оболкийся от Приснодевы Марии, славлю о мне Твое спсительное промышление раб Твой, Владыко: песнословлю Тя, яко Тебе ради Отца познах: благословлю Тя, Егоже ради Дух Святый в мир прииде: поклоняюся Твоей по плоти Пречистей Матери, таковей страшней тайне послужившей: восхваляю Твоя ангельская ликостояния, яко воспеватели и служители Твоего величествия: ублажаю Предтечу Иоанна, Тебе крестившаго, Господи, почитаю провозвестившыя Тя пророки, прославляю апостолы Твоя святыя: торжествую же и мученики, священники же Твоя славлю: поклоняюся преподобным Твоим, и вся Твоя праведники пестунствую. Таковаго и толикаго многаго и неизреченнаго лика божественнаго в молитву привожду Тебе Всещедрому Богу раб Твой, и сего ради прошу моим согрешением прощения, еже даруй ми всех Твоих ради святых, изряднее же святых Твоих щедрот, яко благословен еси во веки веков, аминь. Молитва ко Пресвятей Богородице. Царице моя преблагая, надеждо моя Богородице, приятилище сирых и странных предстательнице, скорбящих радосте, обидимых покровительнице! Зриши мою беду, зриши мою скорбь, помози ми яко немощну, окорми мя яко странна. Обиду мою веси, разреши ту яко, волиши: яко не имам иныя помощи разве Тебе, не иныя предстательнцы, ни благия утешительницы, Токмо Тебе о Богомати, яко да сохраниши мя и покрыеши во веки веков. Аминь. Молитва ко Святым Ангелам К вам, яко заступником и хранителем живота моего аз окаянный припадая молюся: подадите мне молитвами вашими дневное преба=ывание, богоугодно и неискусно от злых деяний и помышлений прейти. Отверзите слух ушию моею, да услышу и разумею дела и словеса Божия душеполезная, да прозрю внутреннима очима, тьмою греховною обдержимый. Молите за мя, по вся часы согрешающаго, да не пояст мене мечь ярости Господни: зело бо превзыдоша беззакония моя на главу мою, и яко бремя тяжкое отяготеша на мне. Ты же, Господи мой Господи, призри на мя, и помилуй мя, и изведи из темницы греховныя душу мою, прежде даже не отъиду отсюду, и не прииду на Страшный оный Суд Твой. Прими моляшыяся за ны святыя ангелы Твоя, выну со страхом предстоят, и тех молитвами, изряднее же Пречистыя Твоея Матере, избави мя Страшнаго онаго и грознаго Суда Твоего. Ты бое си Агнец Божий, вземляй всего мира грехи, распятый на кресте нашего ради спасения: вонми молитве моей, и посли Ангела Хранителя души моей и телу, да тем наставляем, избавлюся от всяких врагов видимых и невидимых, и сподоблюся получити Твою милость , со всеми от века Тебе благоугодившими: яко Ты еси Бог наш, и к Тебе прибегаю, и на Тя надеюся, аще и согреших паче человек, но Тебе не отступих, ни руку моею воздех ко иному богу. Тебе молюся, Господи Иисусе Христе, Тя благословлю, и Тебе поклоняюся от Троицы Единому, со Отцем и Святым Духом, ныне и присно и во веки веков, аминь. |
|
|
|
|
|
|
