Богослужебные тексты, службы (видео и текст)
» Канон благоверной княгине Анне Кашинской
к Дискуссиям
|
Канон благоверной княгине Анне Кашинской
Тропарь, глас 3-й Днесь восхваляем тя, преподобная мати, великая княгине инокине Анно: яко бо лоза плодовита посреде терния, процвела еси во граде Кашине твоими добродетельми, всех удивила еси чудным твоим житием, темже Христу Богу угодила еси, и ныне, радующися и веселящися, пребываеши с лики преподобных жен, наслаждающися райския красоты и веселия. Молим убо тя: моли о нас Человеколюбца, Христа Бога нашего, даровати нам мир и велию милость. Ин Тропарь, глас 4-й Просветившися Божественною благодатию, преподобная, и правостию умною душу твою привязавши в любовь Христову, тленныя, и красныя, и временныя нивочтоже вменила еси. Крестным знамением на мысленныя враги мужески вооружившися, постническими подвиги, постом и молитвами углие страстей угасила еси, достославная Анно, и по смерти источаеши благодать притекающим к мощем твоим. И ныне, в Небеснем Чертозе с мудрыми девами предстоящи Христу, моли о нас, почитающих святую память твою. КАНОН, глас 3-й Песнь 1 Ирмос: Воды древле манием Божественным во едино сонмище совокупивый и разделивый море израильтеским людем, Сей Бог наш препрославлен есть, Тому Единому поим, яко прославися. Припев: Святая благоверная княгине-инокине Анно, моли Бога о нас. Даждь ми, Господи, разумение, да достойно воспою и прославлю благоугождшую Ти преподобную матерь, прежде бывшую великую княгиню Анну, и возопию Тебе, Христу моему, яко препрославлен еси. Святая благоверная княгине-инокине Анно, моли Бога о нас. О тебе, блаженная мати Анно, хощу ныне язык подвигнути и Слово прострети: споспешествуй ми, недостойному, молитвами твоими, да достойно восхвалю тя и воспою Господеви моему, яко прославися. Слава: Со младых ногтей твоих страх Божий имела еси в сердце твоем, блаженная, егоже до конца содержала еси, укрепляема Божественною благодатию, тем и душу твою спасла еси, выну поющи Христу, яко прославися. И ныне: Тобою, Пречистая Владычице, от всех родов предъизбранная Дево, весь мир обновися, и весь род человеческий от лести диавольския свободися, и вопиет ко Христу, яко прославися. Песнь 3 Ирмос: Неплодная душе и безчадная, стяжи плод благославный, веселящися, возопий: утвердихся Тобою, Боже, несть свят, несть праведен, паче Тебе, Господи. Святая благоверная княгине-инокине Анно, моли Бога о нас. Око душевное чисто и здраво имела еси от юности твоея, блаженная, имже всегда зрела еси к Горнему Селению, егоже и достигла еси, и ныне Христу воспеваеши: несть свят и несть праведен, паче Тебе, Господи. Святая благоверная княгине-инокине Анно, моли Бога о нас. Из благочестиваго корене произрасла еси, блаженная, и, во вся дни жития твоего с супругом твоим чисто и непорочно пребывающи, вопияла еси ко Христу: несть свят и несть праведен, паче Тебе, Господи. Слава: Ничтоже пред Богом вящше есть доброты душевныя. Ты же, преподобная мати, соблюла еси ю непреткновенно, вопиющи ко Христу: несть свят и несть праведен, паче Тебе, Господи. И ныне: Отроковице Чистая, Мати Господа нашего, помози ми, недостойному рабу Твоему, воспети угодницу Сына Твоего и Бога моего, преподобную матерь Анну, и рещи ко Христу: несть свят и несть праведен, паче Тебе, Господи. Господи, помилуй (трижды). Седален, глас 3-й Воспитана была еси, блаженная, от рождших тя в заповедех Господних, яко лоза в красноцветущих виноградех, тем тя ублажаем и святую память твою верно почитаем. Моли Христа Бога, да спасет души наша. Слава, и ныне: Света Превечнаго, от Отца прежде век рожденное Слово Божие, родила еси нам, Пресвятая Владычице, Христа Бога нашего, Имже вселенная от тли смертныя свободися, тем Тя непрестанно с Ним поем и величаем. Песнь 4 Ирмос: Покрыла есть Небеса добродетель Твоя, Христе, из Кивота бо прошед святыни, Твоея Нетленныя Матере, в храме славы Твоея явился еси, яко Младенец руконосимь, и исполнишася вся Твоего хваления. Святая благоверная княгине-инокине Анно, моли Бога о нас. Преукрашена была еси, преподобная мати, добродетельми твоими, яко цветы благоуханными и яко камением драгоценным. Тем и угодила еси Нетленному Царю и Владыце всех, Емуже и воспела еси: Господи, исполнишася вся Твоего хваления. Святая благоверная княгине-инокине Анно, моли Бога о нас. О, твердое основание веры, о, любы к Богу крепкая! В женстем бо естестве мужески победила еси невидимаго врага супостата и тако угодила еси Христу, вопиющи: Господи, исполнишася вся Твоего хваления. Слава: Христов храм была еси, преподобная мати, твоею чистотою и целомудрием и прочими добродетельми, темже вместила еси в себе Святаго Духа, к Немуже и возопила еси: Господи, исполнишася вся Твоего хваления. И ныне: Воистинну всех тварей вышши явилася еси, Владычице, и кто доволен по достоянию изрещи величие Твое? Пространнее бо небес явися чрево Твое, в немже носила еси всеми Невместимаго Бога, к Немуже и мы вопием: Господи, исполнишася вся Твоего хваления. Песнь 5 Ирмос: Яко виде Исаия образно на Престоле превознесена Бога, от Ангел Славы дориносима, о, окаянный, – вопияше, – аз! провидех бо воплощаема Бога, Света Невечерня и миром владычествующа. Святая благоверная княгине-инокине Анно, моли Бога о нас. Аще и во благоденствии пребывала еси, блаженная мати, и всяко изобилие близ себе имела еси, никакоже вдалася еси на покой и веселие пищное, но, зельным трудом и воздержанием тело твое удручающи, воспевала еси Жениха твоего, Христа, Света Невечерня и миром владычествующа. Святая благоверная княгине-инокине Анно, моли Бога о нас. Любовию Христовою уязвившися, блаженная мати, великая княгине инокине Анно, яко доброплодная лоза в винограде, процвела еси во граде Кашине благими твоими деянии и победила еси бесовския полки, воспевающи Христа, Света Невечерня и миром владычествующа. Слава: Истинным светом Христовым осияна была еси, мати святая, великая княгине инокине Анно, насыщающися велия благодати и воспевающи Его, Света Невечерня и миром владычествующа. И ныне: Ты убо, Чистая Мати Господня, чистотою и девством всех превзошла еси темже избрана была еси в Божие вместилище и родила еси нам Христа Бога нашего, Света Невечерня и миром владычествующа. Песнь 6 Ирмос: Бездна последняя грехов обыде мя, и исчезает дух мой; но прострый, Владыко, высокую Твою мышцу, яко Петра, мя, Управителю, спаси. Святая благоверная княгине-инокине Анно, моли Бога о нас. Из благочестиваго корене произрасла еси, преподобная мати, великая княгине инокине Анно, благочестием же и верою, яко цвет, процвела еси во твоем отечестве, во граде Кашине, и прешла еси к Горнему жительству, вопиющи ко Христу: яко Петра мя, Управителю, спаси. Святая благоверная княгине-инокине Анно, моли Бога о нас. Воистинну достойна еси похвалы велия, преподобная мати, великая княгине Анно, яко в женстем естестве мужескую крепость имела еси, и победила еси супостата диавола, и воспевала еси ко Владыце Христу: яко Петра, мя, Управителю, спаси. Слава: Ей, воистинну светел и тверд ум имела еси, преподобная, вся бо красная мира сего, яко уметы, вменила еси, блаженная, и ничтоже возможе поколебати непорочную твою душу, внегда воспевати ти Христу: яко Петра, мя, Управителю, спаси. И ныне: Лестным убо змииным преступлением низпадохом, но с Сыном Твоим, Иисусом Христом, Богом нашим, совостахом, Мати Господня, Егоже родила еси нам, Свет, и Живот, и Воскресение. Господи, помилуй (трижды). Слава, и ныне: Кондак, глас 4-й Яко пресветлая звезда, явилася еси в Российстей земли, во граде Кашине, преподобная мати Анно, во всех благочестивых и верных женах, аки крин, процвела еси чистым и непорочным твоим житием, во инокинях же совершенными твоими труды и подвиги, и возшла еси к Вышнему граду, радующися и веселящися, яко добре совершивши твое течение, и ныне честныя твоя мощи, аки бисерие драгое, явишася, на исцеление всем, приходящим с верою. Тем и вопием ти: радуйся, всекрасная душею, и моли Христа Бога о спасении душ наших. Икос Приидите, вси благовернии людие, воспоим и прославим преподобную великую княгиню инокиню Анну и тако к ней возопиим: радуйся, мати святая, великоименитая княгине инокине Анно, яко от юности твоея возлюбила еси Христа и по заповедем Его шествовала еси; радуйся, яко зельным твоим воздержанием тело твое удручила еси. Радуйся, яко сподобилася еси от Бога дара чудотворений; радуйся, яко озари Бог сердце твое, во еже восхотети облещися во иноческое одеяние и последовати Христу. Радуйся, нищим питательнице и сирым заступнице; радуйся, всем российским женам похвало и утверждение. Радуйся, всей Российстей стране твердое удобрение; радуйся, яко вместо земнаго царства Небесное обрела еси. Радуйся, яко по смерти твоей тело твое в недрех земли не подвержеся тлению; радуйся, яко предстоиши с лики святых и преподобных жен Невечернему Свету и молишися о спасении душ наших. Песнь 7 Ирмос: Якоже древле благочестивыя три отроки оросил еси в пламени халдейстем, светлым Божества огнем и нас озари, благословен еси, взывающия, Боже отец наших. Святая благоверная княгине-инокине Анно, моли Бога о нас. Истинно велие чудо явися во граде Кашине, яко честныя твоя мощи многа лета землею покровены быша, ныне же Божиею благодатию явишася верху земли на исцеление всем, приходящим с верою и вопиющим: благословен Бог отец наших. Святая благоверная княгине-инокине Анно, моли Бога о нас. Како возможем не дивитися Тебе, блаженная мати? Пребыла бо еси, аки свеща светящи, посреде российских жен чудным твоим житием, выну воспевающи: благословен Бог отец наших. Слава: Утверждена была еси, мати преподобная, аки адамант крепкий, добродетельми твоими и, яко невеста, украшена была еси монисты златыми – делы твоими благими, воспевающи Христу благословен еси, Господи Боже отец наших. И ныне: Юницу Тя нескверную, Деву и Богородицу, издалеча пророцы имены различными нарекоша: ин бо Тя гору мысленну нарече, другий же – Родительницу Божию, ов же – руно, ов же – священную дверь. Темже и мы вси достойно Тя поем и славословим во веки. Песнь 8 Ирмос: Служити Живому Богу в Вавилоне отроцы претерпевше, о мусикийских органех нерадиша и, посреди пламене стояще, Боголепную песнь воспеваху, глаголюще: благословите, вся дела Господня, Господа. Святая благоверная княгине-инокине Анно, моли Бога о нас. Како изглаголю величие Божие на тебе, преподобная мати Анно, явльшееся? Яко по толицех летех обретошася мощи твоя нетленны, на удивление всем человеком, поющим: благословите, вся дела Господня, Господа. Святая благоверная княгине-инокине Анно, моли Бога о нас. Ничтоже есть дражайше пред Богом добродетельныя души, еяже весь мир недостоин. Темже и ты, преподобная мати Анно, паче всего прилежала еси о сицевей безсмертней вещи, поющи: благословите, вся дела Господня, Господа. Слава: Яко свещу светлу, уготовала еси кроткую душу твою, преподобная мати Анно, темже по смерти твоей многа исцеления недужным излияшася от честных мощей твоих. Сего ради мы вопием: благословите, вся дела Господня, Господа. И ныне: Господа моего и Бога Рождшая, Мати Безневестная, дерзновение имущи к Нему, заступи и сохрани мя Твоим ходатайством, яко да воспою: благословите, вся дела Господня, Господа. Песнь 9 Ирмос: Сладкою Пречистаго Твоего Рождества стрелою уязвлени, Чистая, Твоей достожеланней доброте дивящеся, песньми Ангельскими достойно Тя яко Матерь Божию величаем. Святая благоверная княгине-инокине Анно, моли Бога о нас. Имиже весть судьбами прославляет Господь святыя Своя, ихже имена написана суть на Небеси в книгах животных, Тойже и тя прослави Своим милосердием, преподобная мати Анно. Тем тя поем и величаем. Святая благоверная княгине-инокине Анно, моли Бога о нас. Ныне с лики Ангельскими на Небесех предстоиши Владыце всех, преподобная мати Анно, молящи о граде твоем и о чтящих верою святую память твою, недугующим же подающи исцеление от честных мощей твоих. Тем тя поем и величаем. Слава: Юна еще возрастом бывши, преподобная мати Анно, тесным и прискорбным путем шествовала еси, всякия сладости, яко горести, отвращающися, ныне же достигла еси неизреченныя радости. Тем тя поем и величаем. И ныне: Ааронов жезл прозябей, Владычице, прежде неплоден быв, послежде цвет и плод испусти; такожде и Ты, Пресвятая Дево, безмужно родила еси Христа Бога нашего. Тем Тя поем и величаем. |
|
|
|
|
|
|
