Богослужебные тексты, службы (видео и текст)
» Канон преподобному Иосифу Волоцкому
к Дискуссиям
|
Канон преподобному Иосифу Волоцкому
Тропарь, глас 5-й Яко постников удобрение и отцев красоту, милости подателя, разсуждения светильника, вси вернии сошедшеся восхвалим, кротости учителя, и ересей посрамителя, премудраго Иосифа, российскую звезду, молящася Господу, помиловатися душам нашим. Канон Глас 2-й Песнь 1 Ирмос: Во глубине постла иногда фараонитское всевоинство преоруженная сила, воплощшееся же Слово всезлобный грех потребило есть, препрославленный Господь славно бо прославися. Припев: Преподобне отче наш Иосифе, моли Бога о нас. Тебе твоего, блаженне, учения долг приносяще, воздаяния простираем, венец похвальный плетуще: ты же любовию увязен, пребогате, твоими святыми молитвами, благодать нам подаждь духовную. Преподобне отче наш Иосифе, моли Бога о нас. Всегубительное стремление страстей, отче, увядил еси, словесным объят Богомудрием, благопребытен был еси, и благогласен, кроток же и смирен, словом же премудрости, преподобне отче Иосифе, и разумом венчан. Преподобне отче наш Иосифе, моли Бога о нас. Священно украсил еси себе, преподобне отче, детельным разумом благодати, Богоглаголиве Иосифе, желая венца славы Христовы, и своея надежды изрядно, блаженне, не погрешил еси. Слава: Целомудрие удержал еси яве, крайнюю же кротость, и высокогласное смирение: имиже возвышаемь, трудов твоих действом и видением радуяся принесеся, венец неувядаемый приим трудов твоих воздаяния. И ныне: Тварей явилася еси, Чистая, всех видимых и невидимых превышши Всенепорочная, Зиждителя бо родила еси, якоже изволи воплотитися во утробе Твоей. Егоже со дерзновением моли спасти поющия Тя. Песнь 3 Ирмос: Процвела есть пустыня, яко крин, Господи, языческая неплодящая Церковь Пришествием Твоим, в нейже утвердися мое сердце. Преподобне отче наш Иосифе, моли Бога о нас. Даждь, Христе Спасе, прощение многих наших согрешений, яко да и мы почитаем память Твоего угодника преподобнаго Иосифа, его же молитвами спаси ны. Преподобне отче наш Иосифе, моли Бога о нас. Твоими молитвами Милостиваго умоляй Бога, преподобне отче наш Иосифе, и греховный мрак печали нашея разори, и благодушия утешение низпосли. Слава: От младенства ты, блаженне Иосифе, познан был еси Богом, и на Того надеялся еси, наставляешь на спасительная Его повеления. Емуже ныне предстоя, со дерзновением о нас молися. И ныне: Единаго Святыя Троицы, Слова Сына родила еси, Дево Пречистая. Егоже с преподобным Иосифом о рабех Твоих моли, верою просящих грехов прощения. Господи, помилуй (трижды). Седален, глас 3-й Христова угодника, Евангельскаго учения послушника, светло празднуем преподобнаго Иосифа память, приидите ублажим странноприимца суща, сиротам и вдовам заступника тепла, и нищим дателя нескудна, целомудрия хранителя, и добродетелей делателя, и ересей обличителя непостыдна, и светильника русскаго, егоже ради просяще от Христа душам нашим спасения, и миру велия милости. Слава, и ныне: Земнороднии Тобою спасени быхом, Пречистая Богородице, прежде век бо из Отца рождшагося Сына Божия породила еси, за милосердие многое благоволившаго из Тебе родитися: Иже спасе Адама праотца, и рая сотвори жителя. Егоже моли, Мати Преблагословенная, спастися нам, верно поющим Тя. Песнь 4 Ирмос: Пришел еси от Девы, не ходатай ни Ангел, но Сам, Господи, воплощся, и спасл еси всего мя, человека. Тем зову Ти: слава силе Твоей, Господи. Преподобне отче наш Иосифе, моли Бога о нас. Ты, преподобне Иосифе, монашествующих был еси венец, не камением многоценным украшен, но добродетельми обложен, и явился еси, блаженне, благодарованное воистинну украшение. Преподобне отче наш Иосифе, моли Бога о нас. Божественную, Богомудре, почтил еси Мудрость, яже тя даровании благими обогати, славу вечную тебе исходатайствовавши, преподобне отче Иосифе, всечестне. Слава: Светлостию нравов твоих, и образы благодати, преподобне отче Иосифе, подобне пожил еси: темже благоприступен ты всем был еси, всеблаженне досточудне. И ныне: Умерщвление плодом мне Ева принесе, Ты же, Жизнь рождши Ипостасную, Пречистая, абие исправила еси. Темже зовем Ти: слава силе Твоей. Песнь 5 Ирмос: Ходатай Богу и человеком был еси, Христе Боже, Тобою бо, Владыко, к Светоначальнику, Отцу Твоему, от нощи неведения приведение имамы. Преподобне отче наш Иосифе, моли Бога о нас. Умом чистым Писанием Божественным беседовал еси, богоглаголиве Иосифе, и видения и деяния собрав богатство, отче преподобне. Преподобне отче наш Иосифе, моли Бога о нас. Премудрости глубину испытав, мудре Иосифе, достигл еси обрести, елико благопотребно, и бисер многоценный болезньми стяжал еси, преблаженне, разума. Слава: Аще земное отечество, блаженне Иосифе, оставил еси, всячески благоименитну Божия Матери обитель создал еси, и множество монашествующих в ней собрал еси. Сего ради первое Отечество Небесное приял еси. Со дерзновением, отче, за ны молися Христу Богу, рабы твоя. И ныне: Се во чреве, Богородице Пречистая, Христа Бога паче слова имела еси, якоже Исаиа провозгласи: выше естества, Сего, Богородительнице, родила еси. Песнь 6 Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи. Преподобне отче наш Иосифе, моли Бога о нас. Вселенней светило пресветлое, отче, явился еси, Иосифе, словесы духовными просвещая верою и любовию к тебе притекающия. Преподобне отче наш Иосифе, моли Бога о нас. Блаженное житие, отче, прешел еси, наздав убо чувства, вне был еси мирскаго мятежа и Богу приближился еси, преподобне Иосифе. Слава: Зело милостива и странноприимца показа тя Спас наш миру, отче, и врача болящим, Иосифе, сиротам и убогим заступника любезна. И ныне: Паче естества Дево, родила еси, и вечнуеши Дева, явльшися истиннаго Сына и Бога Твоего, Мати Чистая. Господи, помилуй (трижды). Слава, и ныне: Кондак, глас 8-й Жития треволнения, и мятеж мирский, и страстная взыграния в ничтоже вменив, пустынный гражданин показался еси, многих быв наставник, Иосифе преподобне: монахов собратель и молебник верен, чистоты рачитель, моли Христа Бога спастися душам нашим. Икос Божественными добродетельми твоими себе, мудре, украсил еси и Спаса Христа жилище соделал еси, отче, мужественне. Якоже злато искусився верою к Богу и надеждею, и любовию обеты полагая. Воздержанием постився, яко безплотен, в целомудрии, и в смирении возвысился еси. Темже и мы молитвами твоими просвещшеся, преподобне Иосифе, вопием ти: радуйся, яко измлада Богу послужил еси; радуйся, яко притекающих к тебе ко спасению ходатай был еси; радуйся, христолюбивому воинству похвала; радуйся, яко твоими молитвами противнии побеждаются; радуйся, яко всем просящим даеши дар, от Господа дарованный тебе; радуйся, яко чудесы тя Бог прославляет, и всех звати тебе научает; радуйся, преподобне отче Иосифе, постников удобрение. Моли Христа Бога спастися душам нашим. Песнь 7 Ирмос: Богопротивное веление беззаконнующаго мучителя высок пламень вознесло есть. Христос же простре Богочестивым отроком росу духовную, Сый благословен и препрославлен. Преподобне отче наш Иосифе, моли Бога о нас. Благоухают, преподобне Иосифе, твоих учений сладкая словеса любящим тая, устрашают же еретиков мудрования. Благодатию бо Святаго Духа глаголал еси, Божество Едино проповедуя в Триех Лицех: Слова же Воплощение поя, благоухаеши нас, пребогате. Преподобне отче наш Иосифе, моли Бога о нас. Риз худость имел еси преподобне Иосифе, в зиме же и лете не пременяя, болезненно претерпевал еси Бога ради совершенно; темже и Небеснаго приятия сподобился еси наследник быти. Слава: Слово твое солию растворено, отче, и житие твое благодатию, преблаженне, сияя явися пречудне. Темже и в Вышния Обители радуяся вселился еси, Христу со дерзновением ныне предстоиши о нас моляся. И ныне: Управляющи, Пречистая, наше житие, к Твоему всетихому пристанищу направи: Бога бо родила еси благих Источника, всем подающи верным нетления благодати. Песнь 8 Ирмос: Пещь иногда огненная в Вавилоне действа разделяше, Божиим велением халдеи опаляющая, верныя же орошающая, поющия: благословите, вся дела Господня, Господа. Преподобне отче наш Иосифе, моли Бога о нас. Венец благолепен, Христос Жизнодавец на верх твой положи, тезоименне Иосифе. Деяньми бо просиял еси и видении, зовый: благословите, вся дела Господня, Господа. Преподобне отче наш Иосифе, моли Бога о нас. Вся прешед чувственная, преблаженне, Уму Первому приближился еси, души твоея чистотою, жития же светлостию, венченосче Иосифе, зовый: благословите, вся дела Господня, Господа. Слава: В души твоей Божественное богатство Духа Святаго собрав, непорочную молитву и чистоту краснолепную, бдение и воздержание; сего ради жилище Святыя Троицы явился еси, преподобне Иосифе. И ныне: Владычице Пречистая, грешников спасение, приими мольбу сию, и избави мя от грехов моих, Твоему Сыну прибегающаго, молитвами угодника Твоего, преподобнаго Иосифа. Песнь 9 Ирмос: Безначальна Родителя Сын, Бог и Господь, воплощся от Девы, нам явися, омраченная просветити, собрати расточенная. Тем Всепетую Богородицу величаем. Преподобне отче наш Иосифе, моли Бога о нас. Пречестный отче Иосифе, ныне чисто услаждаешися пищею паче умною, идеже собори святых окрест Господа ликуют, блаженне, иже ныне чтущия тя, ходатайствуя к себе привлецы. Преподобне отче наш Иосифе, моли Бога о нас. Прешел еси радуяся к желанием рая, ко единому истинно яве блаженству, к пребольшей доброте, и к жизни истинно нестареющейся, и к Свету Невечернему, Богоносе отче Иосифе. Слава: Якоже солнце просиял еси в монашеских соборех, от младых бо ногтей освящен был еси, якоже зарю испущая добродетели своего жития, преподобне Иосифе, Богоносе отче пребогате. И ныне: Разумевше издалече, прозорливыми очесы, пророцы Тя яве провозвестиша, хотящую Матерь быти Вседетеля и Владыки всех. Тем Тя, Всепетая, Богородицу исповедуем. Молитвы преподобному Иосифу Волоцкому Молитва первая О великий наставниче, ревнителю и учителю православныя веры, святе премудре Иосифе! Приими моление нас, грешных, тебе приносимое, и теплым предстательством умоли в Троице славимаго Бога, да ниспослет богатыя Своя милости нам, грешным, да утвердит во Святой Своей Православней Церкви правую веру и благочестие: пастырем ея да подаст святую ревность о спасении словеснаго стада, яко да верующих соблюдут, неверующих же и отпадших от истинныя веры вразумят и обратят. Нам же всем испроси вся благопотребная во временнем сем житии и полезная к вечному спасению нашему. Помяни стадо твое, еже собрал еси, не забуди посещати чад твоих и, яко чадолюбивый отец, не презри, ниже отрини моле¬ния наша, но воздежи руце твои молитвеннеи ко Господу Богу, да отложит праведный гнев Свой, дви¬жимый на ны, и избавит нас от враг видимых и невидимых, от глада, по¬топа, меча, смертоносныя язвы, на¬шествия иноплеменных и междоусобныя брани. Ей, премилосердый заступниче наш, преславный чудотворче, всех нас управи в мире и покаянии скончати живот наш и преселитися со упованием в блаженная селения райская, идеже непрестанно славословится всепетое имя Отца и Сына и Святаго Духа. Аминь. Молитва вторая О преблаженне и приснославне отче наш Иосифе! Ведуще твое велие к Богу дерзновение и к твоему твердому заступлению прибегающе, В сокрушении сердца молим тя: оза¬ри нас светом дарованныя тебе благодати и молитвами твоими помози нам бурное море жития сего преити безмятежно и пристанища спасения неблазненно достигнути: порабощени бо суще суетными, и грехолюбиви, и немощни еже от обышедших нас зол возникнути, к кому прибегнем, аще не к тебе, явивше¬му неоскудеваемое богатство милости в земнем житии твоем? Веруем же, яко и по отшествии твоем множайшее стяжал еси дарование милосердовати бедствующим. Темже убо, припадающе ныне к цельбоносней иконе твоей, умиленно просим тя, святче Божий: сам искушен быв, помози и нам, искушаемым; постом и бдением поправый силу демонскую, и нас от нападений вражиих защити; препитавый гладом погибающих, и нам испроси у Господа изобилие пло¬дов земных и вся яже ко спасению потребная; посрамивый еретическая мудрования, Церковь Святую от ере¬сей и расколов, и смущений молитвами твоими огради: да тожде мудр¬ствуем вси, единем сердцем славяще Святую, Единосущную, Животворя¬щую и Нераздельную Троицу, Отца и Сына и Святаго Духа, во вся веки. Аминь. Молитва третья О великий православныя веры рев¬нителю и учителю, святе премудре Иосифе! Приими моление, от нас, грешных, тебе приносимое, и теплым предстательством умоли в Троице славимаго Бога, да низпослет Он бо-гатыя Своя милости нам, грешным, и рабам Божиим (имена), да отложит праведный гнев Свой, движимый на ны, да избавит нас и зде поминаемых от враг видимых и невидимых. Ей, премилосердый заступниче наш, ис¬проси молитвами твоими нам проще¬ние грехов, исправление жития наше¬го, от болезней и всяких недугов ис¬целение, от наветов и козней диавольских избавление, паче же спа¬сение душам нашим подаждь и небес¬ных благ восприятия сподоби, благодатию и человеколюбием Живоначальныя Троицы, Отца и Сына и Святаго Духа, во веки веков |
|
|
|
|
|
|
