Помощь  -  Правила  -  Контакты

Поиск:
Расширенный поиск
 

Размещено 14:22 28/04/2011
Канон Святой Преподобномученице Анастасии Римляныне

29 октября (11 ноября)

Тропарь, глас 4-й

Агница Твоя, Иисусе, Анастасия зовет велиим гласом: Тебе, Женише мой, люблю, и Тебе ищущи страдальчествую, и сраспинаюся, и спогребаюся крещению Твоему, и стражду Тебе ради, яко да царствую в Тебе, и умираю за Тя, да и живу с Тобою. Но яко жертву непорочну приими мя с любовию пожершуюся Тебе. Тоя молитвами, яко милостив, спаси души наша.

Слава, и ныне: Еже от века утаенное и Ангелом несведомое таинство, Тобою, Богородице, сущим на земли явися Бог, в неслитном соединении воплощаемь, и Крест волею нас ради восприим, имже воскресив первозданнаго, спасе от смерти души наша.

Канон, глас 8-й
Творение Иосифово

Песнь 1

Ирмос: Поим Господеви, проведшему люди Своя сквозе Чермное море, яко един славно прославися.

Припев: Святая преподобномученице Анастасие, моли Бога о нас.

Сию светоносную память твою почитающему, богомудрая, просвещение ми подаждь, души моея тьму отгонящи.
Святая преподобномученице Анастасие, моли Бога о нас.

Всю от пелен тебе самую возложила еси Зиждителю твоему, и огнем воздержания телесныя страсти попалила еси.

Слава: К высоте мучения, мученице, возшла еси, непощадевши плоти, и чертогов мысленных, яко дева, сподобилася еси.

И ныне: Тя, небомерную лествицу, на нейже Бог утвердися, человеки небесны соделав, Отроковице, почитаем.

Песнь 3

Ирмос: Ты еси утверждение притекающих к Тебе, Господи, Ты еси свет омраченных, и поет Тя дух мой.
Святая преподобномученице Анастасие, моли Бога о нас.

Стояла еси пред судищем мучителя, Христа, славная, Творца всех и Владыку, Бога Слова проповедающи.
Святая преподобномученице Анастасие, моли Бога о нас.

Доброта сердечная видимым зраком, славная, издавшися, тя краснейшую зрящим явила есть.
Слава: Богатство неистощимо исцелений тебе подаде, отроковице, Христос, Егоже нищету вольно возлюбила еси.

И ныне: Вещь грехов моих Твоих молитв огнем попали, Мати Света, росу ми божественную оставления носящи.

Моли Бога о нас, святая преподобномученице Анастасие, яко мы усердно к тебе прибегаем, скорой помощнице и молитвеннице о душах наших. (Поклон.)

Господи помилуй. (Трижды.)
Седален, глас 8-й

Воздержания росою страстей погасила еси пламень юношески, огнем же кровей твоих всю прелесть попалила еси и Жениху Слову, яко дар, принесла еси честное девство и доблественное страдание. Темже в чертог введе тя славы, светле добльствовавшую и змия поправшую, Анастасие многострадальная, моли Христа Бога грехов оставление подати чтущим любовию святую память твою.

Слава, и ныне: Яко Деву и едину в женах, Тя безсеменно рождшую Бога плотию, вси ублажаем роди человечестии, огнь бо вселися в Тебе Божества, и яко Младенца доиши Зиждителя и Господа. Темже ангельский собор и человеческий род достойно славим всесвятое Рождество Твое, и согласно вопием Ти: моли Христа Бога, прегрешений оставление даровати, достойно поющим славу Твою.

Песнь 4

Ирмос: Услышах, Господи, смотрения Твоего таинство, разумех дела Твоя, и прославих Твое Божество.
Святая преподобномученице Анастасие, моли Бога о нас.

Тя, иго легчайшее Христово, мученице, понесшую от юности, железное уже носити пребеззаконнующии осудиша.
Святая преподобномученице Анастасие, моли Бога о нас.

Капли кровей твоих многобожия угасиша углие, лучи же чудес твоих страстей вещь попалиша.
Слава: Не обнажи благодати, тело твое обнажив лукавнейший, исткану же паче свыше нераздрану ризу исходатаи тебе.

И ныне: По рождестве пребыла еси нетленна Дева, якоже прежде рождества, юна бо Младенца родила еси, прежде век познаваема.

Песнь 5

Ирмос: Утренююще, вопием Ти: Господи, спаси ны, Ты бо еси Бог наш, разве Тебе иного не вемы.
Святая преподобномученице Анастасие, моли Бога о нас.

Не изнурена огнем вещественным явилася еси, мученице Анастасие, огнь бо тя сердечный божественныя любве орошаше.

Святая преподобномученице Анастасие, моли Бога о нас.

Удареньми лица, мученице Анастасие, украсившися, врагов отразила еси мерзское неразумие.
Слава: Протяжена на древе богомудрая Анастасие, любовию Жениха твоего, божественную страсть образовала еси.

И ныне: Поем Тя, всепетая Владычице Богородице, Бога, бо препетаго плотию родила еси, Пречистая.

Песнь 6

Ирмос: Ризу мне подаждь светлу, одеяйся светом, яко ризою, многомилостиве Христе, Боже наш.
Святая преподобномученице Анастасие, моли Бога о нас.

Сокрушаемо тело ранами являше правость твоея совести, страстотерпице, ко Христу Богу нашему.
Святая преподобномученице Анастасие, моли Бога о нас.

Висящи высоко, раны, мученице, терпящи, и не уязвлено хранящи души благородие, достохвальная.
Слава: Претерпела еси зубов и рук и ног отъятие, мученице многострадальная, взирающи ко Христу, Жениху твоему.

И ныне: Человеколюбца рождши, Бога, благолюбивая Владычице, Того моли геенны огня избавитися нам.

Господи помилуй. (Трижды.) Слава, и ныне.

Кондак, глас 3-й

Девства водами очищенна, преподобная, мученичества кровьми, Анастасие, венчавшися, подаеши сущим в нуждах недугов исцеление и спасение, приступающим от сердца, крепость бо тебе подает Христос, источая благодать приснотекущую.

Песнь 7

Ирмос: Отроцы еврейстии в пещи попраша пламень дерзновенно, и на росу огнь преложиша, вопиюще: благословен еси, Господи Боже, во веки.

Святая преподобномученице Анастасие, моли Бога о нас.

Шум гласа празднующих идеже есть ликуеши, страстотерпице, с девами, Богу Зиждителю песнопоющи: благословен еси, Господи Боже, во веки.

Святая преподобномученице Анастасие, моли Бога о нас.
Уды сокрушаемы зрящи и ногтей истерзание терпящи, принеслася еси Богу жертва, песнопоющи: благословен еси, Господи Боже, во веки.

Слава: Явилася еси, яко лоза, богомудрая, руце и нозе, яко ветви, режемы, и нам мысленно вино источающи, сердца утешающее, и страстей отревающее пиянство.

И ныне: Во всего человека облекся Нескверный кроме греха, из утробы Твоея, Чистая, пройде Плотоносец, Егоже умоли, верою Тя чествующия спасти.

Песнь 8

Ирмос: Седмерицею пещь халдейский мучитель богочестивым неистовно разжже, силою же лучшею спасены сия видев, Творцу и Избавителю вопияше: отроцы, благословите, священницы, воспойте, людие, превозносите во вся веки.

Святая преподобномученице Анастасие, моли Бога о нас.

Юношески добльствовавши, страстоносице всехвальная, и на прелесть воздвигла еси победы, рук бо лишения и ног терпела еси, сосцев же и зубов твоих искоренение, мученице, претерпела еси, в радости песнопоющи: людие, превозносите Христа во веки.

Святая преподобномученице Анастасие, моли Бога о нас.

Всесветла, яко солнце, девства светлостьми, и мучения добротами облистала еси, и мир просветила еси светолучными сиянии твоего терпения, страстотерпице, вопиющи: отроцы, благословите, священницы, воспойте, людие, превозносите Христа во веки.

Слава: Оскверненную страстьми душу мою, богоневесто, и очерненную прилоги змия твоими мольбами от лютых очисти, и светлым осенением твоим, мученице Анастасие, озари вопити: священницы, пойте, людие, превозносите Христа во веки.

И ныне: Тя, Чистую и Непорочную, дева желающи, непорочно и тело и душу соблюде, страстей подпаления терпением испепеливши, искушение же многих претерпевши мук, и ныне в небесных чертозех ликует с Тобою, веселящися во вся веки.

Песнь 9

Ирмос: Ужасеся о сем небо, и земли удивишася концы, яко Бог явися человеком плотски, и чрево Твое бысть пространнейшее небес. Тем Тя Богородицу, Ангелов и человек чиноначалия величают.

Святая преподобномученице Анастасие, моли Бога о нас.

На древе повешена была еси, Слова Божия образующи страсть блаженную, и отсечение терпела еси рук твоих и ног, зубов искоренение, языка же отрезание и сосцев, чистая Анастасие, монашествующих славо и мучеников украшение.

Святая преподобномученице Анастасие, моли Бога о нас.

Яко невеста, украсилася еси добротою, обручившися Жениху страданьми добротворными, внутрь же чертогов световидных, яко избранная, вселилася еси, носящи свещу девственную. И ныне царствующи с Живущим во веки, Анастасие, сияющи.

Святая преподобномученице Анастасие, моли Бога о нас.

Искапают болезни твоя сладость, греха горесть отъемлющу; рака же точит исцелений реки и потопляет вся страсти и недуги лютыя, в славу Спасову, честная Анастасие, иже по достоянию тя славят.

Слава: Доблествоваша жены, Твоим крестом укрепльшеся, Христе всесильне, и вражию главу многокозненную мужески, Слове Божий, сокрушиша, и рая радостно селение получивше, обожение прияша дивное, воспевающе Тя.

И ныне: Понесшаго Тя плоть от Жены, яко позна мученица Твоя, Господи, девственными украшена лучами, и мучения кровию обагрена, Тебе Богу, во след Матере Твоея, славно приведеся, яко царствующему тварию.

Молитва

Девственниц похвало и мучениц славо, Анастасие преподобная! К тебе во умилении сердец наших припадаем и твоего заступления у Господа о нас молим. Аще бо чистоте твоей не поревновахом, и безбоязненнаго исповедания твоего не приобщихомся, паче же многими прегрешеньми и лютыми паденьми и отступствы гнев Божий привлекохом, но не хощем во гресех наших умрети, и на твоя мужеския подвиги взирающе, паки на одоление страстей наших ополчаемся. Сие же ведуще, яко кроме благодатныя помощи ничтоже благое сотворити возможем, тую нам от Господа подати тебе просим. Ты бо, преподобномученице преславная, велие ко Владыце дерзновение стяжала еси, яко прославившая Его в чистей души твоей и в телеси твоем страдальчестем, зане вся прельщения и прещения мучителя презревши, искоренение же зубов, и ногтей изтерзание, и сосцев и рук и ног отсечение сладце претерпевши, дерзновенно вопияла еси: Христос есть богатство мое и похвала. Темже оттого богатства и нашей нищете духовная подаждь дарования, и от безмерных прегрешений жизнь нашу соблюди, мир и безмятежие нам испроси, от нужды и уныния нас предстательством твоим огради, друг ко другу нас в послушании и братолюбии настави, и ко Господу очи сердец наших всегда возводи, во еже присно славити нам Отца и Сына и Святаго Духа Державу, и твое теплое предстательство во веки веков. Аминь.
 
Требуется материальная помощь
овдовевшей матушке и 6 детям.

 Помощь Свято-Троицкому храму