Помощь  -  Правила  -  Контакты

Поиск:
Расширенный поиск
 

Размещено 17:59 27/04/2011


Канон святителю Иоасафу Белгородскому

Память празднуем 4 (17) сентября

Тропарь, глас 3-й

Святителю Христу Богу возлюбленне, правило веры и образ милосердия людем был еси, бдением же, постом и молитвою яко светильник пресветлый просиял еси, и прославлен от Бога явился еси: телом убо в нетлении почивая, духом же Престолу Божию предстоя, чудеса преславная источаеши. Моли Христа Бога, да утвердит нас в Православии и благочестии и спасет души наша.

Ин тропарь, глас 2-й

Молитвенниче издетства преизрядный, Богоизбранный святителю Христов Иоасафе, правило веры и образ милосердия благочестным житием всем являеши и с верою к тебе притекающим обильно исцеления источаеши. Моли Христа Бога, да утвердит правоверие, мир и благочестие и спасет души наша.

Канон Глас 4-й

Песнь 1

Ирмос: Тристаты крепкия, Рождейся от Девы, безстрастия во глубине души тричастное потопи, молюся, да Тебе, яко в тимпане, во умерщвлении телесе победное воспою пение.

Припев: Святителю отче наш Иоасафе, моли Бога о нас.

Иоасафа святителя воспевающе подвиги, очистим помыслы ума нашего, братие, того подвизающе на молитву о прощении грех наших и благодатнаго умиления даровании.

Святителю отче наш Иоасафе, моли Бога о нас.

О твоем благочестии измлада потщавшеся родителие твои, угодниче Христов, достойную мзду трудов своих в тебе стяжаша, яко от младенчества твоего благочестивым нравом радость тем был еси.

Святителю отче наш Иоасафе, моли Бога о нас.

Анне праведней уподобися отец твой, святителю: та бо дщерь свою во святое святых вводиму виде, сей же тя от тояжде Пресвятыя Богородицы архиерейскою славою венчанна в видении чуднем познати сподобися.

Слава: Себе самого плачу окаянный аз, от юности страстем поработився: помилуй мя предстательством твоим, святителю, от юности страсти поработивый и Единому Богу до смерти послуживый.

И ныне: Гору святую, превышнее Носило, Матерь Божию и Деву Истинную по рождестве воспоим,

Песнь 3

Ирмос: С высоты снизшел еси волею на землю, превышше всякаго начала и смиренное вознесл еси из ада преисподняго естество человеческое несть бо свят паче Тебе, Человеколюбче.

Святителю отче наш Иоасафе, моли Бога о нас.

Аще и чадо послушное родителем твоим был еси, Иоасафе, но, Господа паче сих возлюбив, из отеческаго дома спасения ради удалился еси, и научение книжное восприим, во обитель иноческую себе заключил еси.

Святителю отче наш Иоасафе, моли Бога о нас.

Фарисейскаго возношения чужд явился еси, отче преподобне: монашеское же смирение от юности возлюбив, тайными подвиги плоть смирял еси, и душу твою молитвою пред Отцем Небесным просвещал еси.

Святителю отче наш Иоасафе, моли Бога о нас.

Еже жити ми Христос, и смерть приобретение, глаголал еси в себе, Христов угодниче, и болезнем плоть твою сокрушающим, труди ко трудом Господа ради прилагал еси.

Слава: Святое послушание восприим и священства одеждою украшен, Иоасафе угодник Христов учитель добр отроком бывает, словом и житием тех благочестию научая и во младых летех ум зрелый являя.

И ныне: Неискусобрачная Бога плотию рождшая, страстными прилоги преклонена мя утверди: несть бо, Чистая, разве Тебе помощница.

Господи, помилуй (трижды).
Седален, глас 6-й

Кая добродетель не обрете в души твоей обиталища; коего подвига не был еси поборник; нищета бо духовная и о Царствии Небеснем плач, и нрава кротость, и правды искание, и ко ближним милосердие, и сердца чистота во твоем непорочнем житии просияша. Тех убо дарований общники ны молящияся сотвори, и о душах наших предстатель буди, Иоасафе, избранниче Божий.

Слава, и ныне: Благословенную нарекий Твою Матерь, пришел еси на страсть вольным хотением, возсияв на Кресте, взыскати хотя Адама, глаголя Ангелом: срадуйтеся Мне, яко обретеся погибшая драхма. Вся мудре устроивый, Боже наш, слава Тебе.

Песнь 4

Ирмос: Седяй в Славе на Престоле Божества во облаце легце, прииде Иисус Пребожественный, Нетленною Дланию и спасе зовущия: слава, Христе, силе Твоей.

Святителю отче наш Иоасафе, моли Бога о нас.

Вем и аз путь ко спасению ведущий, но лености плоти моея не побеждаю, увы мне! Сего ради тя, святителю, призываю в молитву, да желание спасения во мне утвердиши.

Святителю отче наш Иоасафе, моли Бога о нас.

Якорь спасения имея надежду на Господа, служение игуменское приял еси, и к попечением о строительстве домовнем понуждаемь, душу твою устрояти ко спасению не престал еси: сему и мене многосуетнаго научай, отче преподобне.

Святителю отче наш Иоасафе, моли Бога о нас.

Труды ко трудом прилагая и обитель Лубенскую от разрушения воздвизая, по земли же Российстей за милостынею странствуя, святитель Иоасаф царицу во благочестии утверждает и вся люди спасению душ научает.

Слава: Имея в сердце своем присную к нищим любовь, Иоасаф Христов угодник отеческое попечение о монастырских трудницех являет и от достатка своего щедроты ближним своим отверзает.

И ныне: Госпоже Всепетая Богородительнице, моя помышления Твоими молитвами очистивши, покажи мя благоплодна, Мати всех Бога.

Песнь 5

Ирмос: Ныне востану, пророчески рече Бог, ныне прославлюся, ныне вознесуся, падшаго прием от Девы и к свету умному возносяй Моего Божества.

Святителю отче наш Иоасафе, моли Бога о нас.

Тебе, святителю Христов, молю в сокрушении сердца: якоже в житии твоем кающияся прощал еси, тако и моего сердца сокрушение зря, умоли Господа грехом моим прощение даровати.

Святителю отче наш Иоасафе, моли Бога о нас.

Елень на источники водныя устремляется: ты же, угодниче, ко славе Церкве Христовы вся деяния и помыслы твоя присно устремлял еси, и тако обители святителя Афанасия и Преподобнаго Сергия елико строением церковным, толико и благочестием братии украсил еси.

Святителю отче наш Иоасафе, моли Бога о нас.

Людие, слышите и чудитеся угодника смиренномудрию: сей бо святаго Афанасия в видении зрит и тому вопросившу отвещавает: хощу, да мене якоже грешника накажеши.

Слава: Юнаго Соломона, не богатства, но мудрости от явившагося Господа просяща, похваляет вышний, и вселенная присно прославляет: но того мудрейший Иоасаф показуется, наказания грехом своим от явльшагося святителя испрошая.

И ныне: Воплотися Бог по Ипостаси, Чистая, из Тебе плоти соединяемь, пребыв неизменен, по Божественному существу безплотен.

Песнь 6

Ирмос: Возопи, прообразуя погребение тридневное, пророк Иона, в ките моляся: от тли избави мя, Иисусе Царю Сил.

Святителю отче наш Иоасафе, моли Бога о нас.

Молитвами Преподобнаго Сергия, твоими же труды во славу святых Божиих, паче же сердца чистотою, от Господа еще на земли возвеличен был еси, угодниче, и святительским саном во спасение паствы твоей облечен был еси.

Святителю отче наш Иоасафе, моли Бога о нас.

Огненную ревность о исправлении церковнем являл еси в Белоградстем пределе, Иоасафе святителю: темже и днесь подавай церкви мир, верным утверждение.

Святителю отче наш Иоасафе, моли Бога о нас.

Любве сыновния не отпал еси, на высоте святительства пребывая, и родителю твоему земное поклонение воздал еси, Христу посреде вас сущу: убо и мое смири прегордое сердце, и молитвами твоими вразуми мя.

Слава: Инок нестяжателен на престоле архиерейства пребыл еси, святителю, подвиги поста и молитвы умножая, доброе о себе и о людех вознося моление, иереи же и вся люди заповедем Божиим научая.

И ныне: Всякаго существа вышшее, Слово Божие воплощенно нам родила еси: темже Богородицу Тя устнами и душею проповедуем.

Господи, помилуй (трижды). Слава, и ныне:
Кондак, глас 8-й

Многоразличныя подвиги жития твоего кто исповесть? многообразныя милости Божия тобою явленныя кто исчислит; дерзновение же твое у Пречистыя Богородицы и всещедраго Бога добре ведуще, во умилении сердечнем зовем ти: не лиши и нас твоея помощи и заступления, святителю Христов и чудотворче Иоасафе.

Икос

Пречистою Богоматерию от юности в сосуд благодати избранный, благочестивым житием воистинну добрый пастырь словесных овец явился еси, святителю: темже приял еси дар исцелений от возлюбившаго тя Христа Бога нашего. Сего ради зовем ти: не лиши и нас твоея помощи и заступления, святителю Христов и чудотворче Иоасафе.

Песнь 7

Ирмос: Юноши три в Вавилоне, веление мучителево на буйство преложше, посреде пламени вопияху: благословен еси, Господи, Боже отец наших.

Святителю отче наш Иоасафе, моли Бога о нас.

Святителю Иоасафу дивимся, о людие, ведуще сего, аки Николая Чудотворца, бедных хижины тайно посещающа, или тем дрова своима руками уготовляюща, и биения от привратника приемлюща.

Святителю отче наш Иоасафе, моли Бога о нас.

Язвы греховныя на душах человеческих провидел еси, святителю, и тайная прегрешения их с любовию и долготерпением обличал еси: темже и нас молитвою твоею к покаянию и исправлению жития приведи, и души наша предстательством твоим помилуй.

Святителю отче наш Иоасафе, моли Бога о нас.

Оному властителю уподобихся аз окаянный, иже сам беззаконен быв, ко узником зело жесток являшеся: но якоже того научением твоим исправил еси, отче Иоасафе, святителю Христов, тако и мене научи ко ближним милостива, к себе же жестока быти.

Слава: Царя Небеснаго добрый воине и стада Христова верный пастырю, молитву сотвори о людех твоих, да тихое житие на земли поживше, жизни вечныя на небесех сподобимся.

И ныне: Превечно от Отца возсиявша Бога Слова во утробе плотию заченшую вси ублажаем, яко Матерь всех Бога.

Песнь 8

Ирмос: Избавителю всех, Всесильне, посреде пламене благочествовавшия, снизшед, оросил еси и научил еси пети: вся дела, благословите, пойте Господа.

Святителю отче наш Иоасафе, моли Бога о нас.

Афанасию оному тобою возлюбленному подражатель быв, святителю, потщался еси земное житие во странничестем подвизе скончати, и кончину свою прозрев, пути далекому небоязненно вдался еси.

Святителю отче наш Иоасафе, моли Бога о нас.

Рекл еси людем, от паствы твоея отходя: не имате мене жива узрети. Темже в залог общения тамо гробницу тебе устроити повелел еси. И нас убо научи час смертный памятовати и о души своей попечение непрестанно хранити.

Святителю отче наш Иоасафе, моли Бога о нас.

Елика твоя о монашестем житии бяше ревность, толика и ко твоим присным любы: зане не по плоти точию свои тебе быша, но и духом едино в Бозе с тобою явишася. Того ради восхотел еси родители твоя прежде кончины твоея посетити и благословение Божие тем преподати.

Слава: Игумен, близ места твоея праведныя кончины подвизавыйся, о часе преставления твоего видением извествуется, и свидетель верен о твоем от Бога прославлении абие бывает. И на мне убо твоея молитвы силу покажи, Христов угодниче, и тою от мучительства страстей свободи мя.

И ныне: Всесвятая Дево, Бога Слова рождшая плотию, души моея мрак Твоими молитвами отгнавши, просвети взывающа: Благословите, вся дела Господня, Господа.

Песнь 9

Ирмос: Рождество Твое нетленно явися: Бог из боку Твоею пройде, яко Плотоносец явися на земли и с человеки поживе. Тя, Богородице, тем вси величаем.

Святителю отче наш Иоасафе, моли Бога о нас.

Любы николиже отпадает, глаголет Божественный Дух. Истина сия в чудесех любве твоея известися, святителю Христов, яко болящим исцеление и скорбящим утешение от твоих нетленных мощей источаеши.

Святителю отче наш Иоасафе, моли Бога о нас.

Южский российския земли предел благодарений о чудесех твоих исполнися издревле: ныне же и от дальних стран северных притекающия зрим и исцеленныя страдальцы, о твоем заступлении радующияся.

Святителю отче наш Иоасафе, моли Бога о нас.

Дети страждущия паче иных возлюбил еси, святителю Христов, тем исцеления и благодатную помощь умножая и родители их от скорби к радости пременяя.

Святителю отче наш Иоасафе, моли Бога о нас.

Елиссеа пророка костей прикосновением воста умерый: твоих же мощей целованием безчисленнии исцелишася людие. И мене убо припадающа исцели от греховных страстей, и веру укрепи многогрешныя души моея, отче преподобне.

Слава: Христе Боже, молитвами Иоасафа угодника Твоего мир Церкви подаждь и благостояние, от глада же и пагубы избавление и согрешений наших прощение.

И ныне: Плод чрева Твоего, Радость рождшая, содея ликостоятеля песнь пети Тебе, велегласно радуйся провещавающа.

Молитвы святителю Иоасафу Белгородскому

Молитва первая
О святителю Христов Иоасафе, чудотворче Белоградский! Веруем грешнии и недостойнии, яко очи Господни на праведных и уши Его на молитву их, и того ради к молитвам твоим прибегаем и ходатайства твоего за нас просим, по глаголу апостольскому уповающе, яко любы твоея николиже отпадает. Во гресех и болезнех наших льну курящему-ся и трости сокрушенней уподобихомся, и, аще живем, милостию Бога живем и за молитвы праведник Его. Приклони убо и ты, отче праведне, сердце твое к молению нашему, и предстательством твоим даждь роду христианскому от Господа мир и благословение. Православие укрепи, нападения же лукавнующих и беззаконных на церковь Божию отжени. Умоли Отца небеснаго избавитися нам от нашествия вражескаго, от междоусобий же и смятений народных, от губительных поветрий и смертоносныя язвы, от глада, огня, потопа и иных бед и обстояний. Испроси у Христа Бога душам нашим крепость и телесем нашим потребное здравие, болезнем же исцеление: хромым хождение, слепым прозрение, разслабленным утверждение, печальным утешение и от всех скорбей избавление. Отпадшыя же лозы Христовы ветви паки с тою соедини, еяже и сам причастник быти сподобился еси, да тако прославится тобою пречестное и великолепое имя Бога нашего, Отца и Сына и Святаго Духа, ныне и присно и во веки веков. Аминь.

Молитва вторая
(пред честными мощами Святителя глаголемая)
О великий угодниче Божий и преславный чудотворче, святителю Иоасафе! От дальних и ближних градов и весей сошедшеся, во еже на месте подвигов твоих помолитися и многоцелелебныя мощи твоя облобызати, из глубины сердца взываем к тебе: жезлом благости, якоже пастырь добрый, упаси заблудшыя овцы стада Христова, во дворы Господни сия всели, огради нас от соблазна, ересей и расколов, научи во странствии сущих горняя мудрствовати: разсеянный ум наш просвети и на путь истины направи, охладевшее сердце согрей любовию ко ближнему и ревностию к исполнению велений Божиих, грехом и нерадением ослабленную волю нашу оживотвори благодатию Духа всесвятаго: да твоему пастырскому гласу последующе, сохраним в чистоте и правде души наша, и тако, Богу помогающу, небеснаго царствия достигнем, идеже купно с тобою воспрославим пречестное и великолепое имя Отца и Сына и Духа Святаго во веки веков. Аминь.

Молитва третья
(благодарственная)
О великий Святителю наш и чудотворче предивный Иоасафе, скорый помощниче к тебе припадающих! Милостивно призри на нас недостой-ных, со слезами умиления зде молящихся и благодарение тебе по силе приносящих. Благодарим тя, угодниче Христов, яко услышал еси моления нас недостойных и просимая нам обильно даровал еси. Вемы и усты исповедуем, яко воистину Христу теплый о нас еси молитвенник и, по данной ти благодати и дару, во спасение всем нам потребная даруеши: болящыя исцеляеши, страждущыя утешаеши, мир и отраду скорбным сердцам изливаеши, плачущыя радоватися творити, печаль-ныя ликовати содеваеши: родителем чада воздравляеши, супругом подружия от одра смертнаго возставляеши, враждующия умирот-воряеши, завистливыя твориши милостивы, и всякия неправды караеши, якоже и в житии твоем правды и милосердия мужественный ревнитель был еси. Благодарим тя, Святителю, за великая твоя и нам явленная благодеяния, и смиренно молимся тебе мы недостойнии: предстательствуй за нас у престола Христова, и помози нам память присную твоих благодеяний и щедрот на нас излиянных хранити, да во смирении сердца прочее совершим житие, и небесное да наследуем селение Божественное, молитвами твоими, во веки веков. Аминь.

Молитва четвертая
(о недугующих и страждущих)
О великий угодниче Христов, святителю отче наш Иоасафе, скорый помощниче и дивный чудотворче! Призри милостивно на ны недугую-щыя. Вемы, угодниче Христов, вемы, и усты и сердцем исповедуем, яко по делом нашым беды постигоша нас. С разбойником благоразум-ным исповедуем Господеви, яко достойнная по делом нашым восприемлем и злая сия якоже раби неключимии терпим. Сими бо временными мученьми Господь милосердый сокрушает гордыню и жестоковыйное сердце наше, да вечныя избежим казни, грешником уготованная: сияхом бо семена жития своевольнаго, и жнем терния скорбей. Обаче, немощнии суще, но в покаяние теплое пришедше, о сем молитися дерзаем, да гнев Господень на милость к нам преложится, и тебе, святителю Божий и чудотворче, усердно просим: пролий теплую молитву твою ко Христу Господу нашему, емуже днесь предстоиши и молишися о почитающих тя с любовию и смиренным на твое предстательство упованием. Се бо в житии твоем, Святителю Христов, ни единаго же скорбяща и милости твоея просяща, грехи же своя исповедающа, николиже презрел еси. Умоли праведнаго судию, да преложит гнев правды своея на милование наше. Благодатию его тебе данною, святителю милосердый, уврачуй наша немощи, болезней лютых течения устави, смерти отити повели, и на покаяние силу нам даруй. Старость поддержи, младенцы воспитай, юность уцеломудри, супружества в чистоте и смирении утверди, нам же всем послушание трудолюбное и мирное жительство молитвою твоею даруй, да терпением течем на предлежащий нам подвиг жития сего временного, взирающе на начальника веры и совершителя Господа Иисуса. Емуже слава во веки веков. Аминь.

Молитва пятая
О угодниче Божий святителю Иоасафе! Из глубины сердца взываем к тебе раби Божии (имена), огради нас от соблазна, ересей и расколов, научи горняя мудрствовати, разсеянный ум наш просвети и на путь истины направи, охладевшее сердце согрей любовию ко ближнему и ревностию ко исполнению веле¬ний Божиих, грехом и нерадением ослаблен¬ную волю нашу оживотвори благодатию Ду¬ха Всесвятаго: да твоему пастырскому гласу последующе, сохраним в чистоте и правде ду¬ши наша, и тако, Богу помогающу, Небесна¬го Царствия достигнем, идеже купно с тобою воспрославим пречестное и великолепое имя Отца и Сына и Духа Святаго во веки веков.

 
Требуется материальная помощь
овдовевшей матушке и 6 детям.

 Помощь Свято-Троицкому храму